обновлено: 10:07, 27 ноября 2024
Няръяна Ӈэрм
Тохолкоди’’ нямна
Носиндалава’ ирыхына Саляӈгардахана илебей ненэцие’’ тохолкулвахана Касим Анверович Лайшев’ академик ты’’, хоскы’’, вэнеко’’ лекарабтамбадаӈэ тохолкоди’’ урокм’ минресь.
Пыда нюрте’’э’ ханзер’’ ӈэрм’ яхана манзара’’мамда ваде’’ӈась:
— Мань ветеринарной наука’ лекарадм’, Санкт-Петербургхана, «РАН»м’ нюбета няби «общая генетика РАН» институт’ ӈэвахана мэдм’. Мале няхар’’ юкад вата по’’ ямбан’
ӈэрм’ яхана манзарадамзь. Норильскхана школам’ мале’’мяхадани Ленинградской ветеринарной институтхана тохолкудамзь. Тад пуна’ Норильскан’ манзараванзь тэвываць. Ӈадьбяни ты, ӈани’ ӈэрм’ яхана илена’’ сармик лекарабтамбавам’ теневав. Манзаями хамедамбив, мэнев.
Урок’ ямбан’ ваде’’мандада ӈокась, тохолкода’’ нянда ӈули’’ сававна инзелець. Академик лекциямда мале’’мяхаданда хусувэдо’ хонаркусь. Илебей ненэця’’ ӈамдёмя лоходандо’ тарпа’’махадандо’ намдавыдо’ харто’ помнандо’ тасламбидонзь.
Раиса Езынгим’ намдавыта нямна хонрадамзь. Пыда тарем’ мась:
— Мань ихинани ӈока тарана юнм’ намдавами ӈули’’ сава. Касим Анверович няна’’
ехэрана’’ ты’’ хабцяӈо, ханзер’’ лекарабтамбавамдо’ ваде’’ӈась. Россияна’ ӈэрм’ я ӈардавна тет ты’’ тэнз’’ танявам’ намдаваць. Тамна ӈока юне’’ нямна лаханакурӈась. Инзелеб’’ нюрцямзь.
Касим Анверович сармик’’ лекарабтамбадаӈэ тохолкадаха’’ ваде’’мы’’ юнеда саць
тараӈгу’’. Тад нерня’ илебей ненэця’’ пяванда манзаяндо’ нямна тамна ӈокам’ теневаӈгу’’.
Руфина Окотэтто’ падвы
Сидяӈг: Р. Окотэтто’ тадтавы
