обновлено: 10:33, 15 ноября 2024
Няръяна Ӈэрм
Тохолкова’ нямна тасалковы’’
Ӈацекы тохоламбада’’, ӈарка учёной’’, тодо ё’’ тер’’ серо ня’’амбада’’ ӈобт’ ма’’лёвы. Тасалковадо’ школа’ пуд манзаядамдо’ тохоламбади’’ нямна ӈэвы. Тикы’ хавна тамна тарана’’ вади мэ’’мы’’.
Ямал’ тер’’ вади минренаӈэ няхар’’ нява’’ таравы’’. Ӈэрм’ тер’’ серо тидхалембада департамент’ нермбэртя Ульяна Каленюк интернет’ мутрам’ няд’’мяць лаханавы. Ӈарка маркана ма’’лёвы няхата ваде’’мыда тодо серо’’ нямна ӈэвы’’. Пили’’ нерде’ школахана тохолкова’ ирмня манзаи тохоламбавам’ тензебтевы. Ненэся тарця. Ямал’ тиӈгэвна хусувэй школахана ӈаркамбой ӈацекы’’ 14 илаӈганандо’ тараванда манзаядамдо’ тохоламба пирӈа’’. Ханяӈы’’ ӈацекы’’ нюдя нидо’ маниенаӈэ тохолку’’. Ӈанидо’ сэдора, ӈавар пиремба, тамна ӈани’’ манзаяха’’ тоходана’’. Хасава ӈацекы’’ «сантехник», «плотник» сертабада манзаи торомдамби’’. Тарем’ тикы теневабцудо’ няд’’маӈэ мэтыдо’. Школа’ пуд ӈудаханато’ тохолавы манзаяндо’ нямна падарто’ таняӈгу. Студент’’ нямна яӈга вадамда мэ’’мы. Е’’эмняндо’ ӈадимдевы няд’’ми ваде’’мы. Вадавнанда ӈарка яна’’ ӈардавна ӈокханда сидя юр’’ илебей ӈэрм’ тер’’ тохолкурӈа’’. Хусувэй по’ школам’ ёльцевэхэт тамна самляӈг ю’’ ӈацекы’’ таня’ тохолкованзь хан’’ӈа’’.
Аксаркахад ӈацекы тохоламбада Ольга Пандо таняна мэвы. Ненадовна вадада урокаханато’ ӈэрм’ яна’’ тер’’ падвы толабавандо’ нямна ӈэвы. Инда ядэрабцо’ сер’ пыдо’ Ямал’ ненэцие’’ илам’ ямидхы похот тюку ялэна’’ ӈэсонд’ ваде’’ӈадо’. Пуданда Ирина Кожевина лаханавы. Пыда Ямальской многопрофильной колледжхана манзарана. Ненадовна ӈацекы тохоламбадаӈэ тараванди тензебтевы. Колледжм’ ёльце’’махадандо’ теневабцудо’ ӈокамдамба институтха’’на тохолко пирӈадо’. Тохолковандо’ мальӈгана мале тасламбидо’, хурка ӈарка хардахана тэравы манзаямдо’ тамна’ тяха’ тохоламбаӈгудо’. Таняна сидто’ мале ӈатеӈгу’’.
Тодо’’ ё’’ тер’’ нито’ вади намдавандо’ пуд маси’’ сяхари’ харто’ яханато’ няд’’маӈэ, табекоӈэ мэтыдо’.
Г. Окотэтто’ падвы
