Няръяна Ӈэрм
Тохолкова’ подо’ тензебтевы’’
Ямал’ тиӈгэвна илена’’ ӈацекы’’ нерняӈы илаӈганандо’ тараванда манзаядамдо’ тохолаванзь Салехардан’ тосеты’’. Таняна тохолко ядо’ таня. Ямальской многопрофильной колледжм’ нюбе’’ӈа. Иландо’ нерняри’ миӈа. Ӈарка нидо’ няць хуркари’’ яля’ ня’ ӈэда’’ серкана тара’’. Тандая’ нядандо’ ӈани’ ӈопой сава юнм’ намдаваць. Толаӈгось лохондо’ мюня’ ненадо мядондидо’ ядабтамбавы’’.
Неноховавна ӈацекы тохоламбадаӈэ тараванда’’ таняна мэвыць. Пыдо’ тохолкова’ яндо’ невхы’’ иле’’ми тензебтеванзь ӈобт’ ма’’лёвыдаць. Мядондаӈэ ӈыхы’’ похо’’на тохолковы’’ яндо’ тер хамы’’. Ӈокамбой пелядо’ школаха’’на манзарана’’ ненэця’’.
Тад тованда похона Салехардской педагогической колледж пили’’ нерде ӈади’’махаданда 95 поӈэ ханда. Тамальӈгана Совет’’ илам’ нерня’ минрена’’ ватовна тарця тохолкось’ ям’ серта таслаць, техникумӈэ нюбе’’ӈадонзь. Сямянхат нерденаӈэ 1938 похона си’’ив илебей’’ ненэця’’ тохолковамдо’ таняна ёльцевэдо’. Нюртей толырм’ мэта дипломам’ Иван Григорьевич Истомин ня’’амвэда. 1975 похона яна’’ ерво’’ ватовна педагогической училищем’ Анатолий Зверев’ нюмгана ненадумдадонзь. Пыда ӈани’ таняна тохолковы яна’’ тер.
«Маяк для многих поколений» лахарёхонандо’ тензебтевэдо’ ӈока. Вадам’ минревы хасава ӈацекы тарця вади мэ’’ӈась:
— 1932 похона яра’ иры’ 14 яля’ Саляӈгардахана педагогической техникум ӈадимясь. Тамальӈгэхэд ӈокханда хасава юр’’ тет по’’ хая’’. Ӈока юнета’’ яна’’ тер’’ тид’’ ӈэда иландо’ сехэрым’ тюку ненадо тохолкова’ яхад пявэдо’.
Теда’ товы’’ мядондидо’ ӈопой ӈарка нямдо’, Егерь Нина Михайловнам’ манэць маймбавы’’. Пыда колледжхана 1978 поход манзара. Илебей ненэцие хаби’’, ӈысми’’ вадан’ тохоламбида. Сита няд’’мяць тамна тодо’’ тэнз мэта’’ ӈацекы’’ Ямална’’ тер’’ невхы ила’ саирм’ торомдамби’’. Нина Михайловна хусувэй товы ненэцям’ саву’’ӈась:
— Алла Хосевна, Валентина Романовна, Вероника Егоровна, Валентина Иосифовна, тамна ӈани’’, тикы’’ мал’ сава нини’’, мал’ тюкона тохолкурӈаць. Ямал яна’’ тиӈгэвна манзара’’. Теда’ мале пыдо’ харто’ тохоламбавы’’ ӈацекыдо’ колледжан’ тохолкованзь турӈа’’. Тюку яля’ маня’’ ӈобкана сиддо’ тохоламбавыдо’, тохолко ня’’мы нидо’ сава ихина тензебтембива’’. Сяӈок юнета ненэць’ тюкона тохолковакы. Нюбедо’ мал’ теневына’’. Ямална’’ е’’эмня ӈули’’ ӈарка таром’ минре’’. Ханяӈына’’ мале яӈгу, тарем’ ӈод’’ тенейна’’, сертавы’’ манзаидо’ пудандо’ хаи’’.
Мядондахат Татьяна Власовна Гостюхина лаханась:
— Мань 1971 -1975 похо’’на тохолкурӈадамзь. Сидна’’ табедамбавы’’, иланд’ тидхалембавы’’ ӈарка нина’’ е’’эмнана’’ варемдо’ мэць манзараць. Нюбедо’ сяхаӈгарт’ нина’’ юраӈгу’’, тикы’’ — Хельми Матвеевна Агонен, Мария Александровна Смирнова, Августа Михайловна Бабошина, Элеонора Исаакиевна Вакуева. Пыдо’ мэ’’мы’’ вадидо’ тенад’ илаӈганана’’ ненадумда’’маӈэ мэ’’эйна’’. Хусувэй ненэць’ савариӈэ ӈэсь нида пирас’’, вэва иӈута ӈани’ таня. Ӈацекы тохоламбава’ серкана сидна’’ тарем’ табедамбасеты’’: «Яля’ няӈэрим’ маниеда’’, таняри’ енада’’. Тикырихина ӈацекы’’ нянда’’ инзелеӈгу’’».
По’ тяхана колледжхана тохолкода’’ ӈацекы’’ тев’ ёльцяӈгана мядондидо’ ӈани’ ӈатеӈгудо’, сававна ядабтамбаӈгудо’, таславы яляхана ӈобт’ тэваӈгуд’’.
Автор: Галина Окотэтто’ падвы
Авторы
Няръяна Нгэрм
Темы