Няръяна Ӈэрм
Тохолкова – тарана серˮ
Выӈгана нисянатоʼ, небянатоʼ ядхана вадёнанаˮ ӈацекыˮ техэ паӈгхандоʼ луцаʼ вадамʼ ехэрадоʼ. Лаханабтоʼ ӈодˮ ханяӈытоʼ вадаˮ хэтырˮ яхандоʼ ниˮ хаˮморˮ. Хахаяда поʼ хойʼ терˮ ӈацекыˮ едʼ таславы тохолковамʼ ӈадимдець. Мале сян ирынʼ матˮ потнакоˮ школанʼ ханˮӈаˮ. Таняна нюртей тохолковамдоʼ мэˮӈаˮ. Тикыʼ нямна тарця юнмʼ намдаваць.
Округхананаˮ тюку поʼ тохолковахана няхарˮ юрˮ ӈацекыˮ мэвыˮ. Пыдоʼ еˮэмняндоʼ таславы «Готовимся к школе» нюбета программавна тодоˮ районхаˮна тохолковыˮ. Няхарˮ ирыʼ серʼ ты пэртиˮ ӈэсыхыˮна, таӈоцяӈгаˮна, пэдъяхаˮна ӈобтʼ маˮлюрмыˮ. Сидндет подоʼ яӈгодаˮ таняʼ ядэрмыць.
Тохолковамдоʼ ея мяканатоʼ мэˮмэдоʼ. Ямалнаˮ тиӈгывна 68 группахана манзаравыˮ. Ӈарка нидоʼ сиддоʼ падна, лахана табедамбавыˮ, хардахана ӈока нитоʼ поӈгана иле тохоламбавыдоʼ. Тикыʼ хавна падтаӈговыˮ, пластелинхад хуркари мэкад ӈавэ сертабавыˮ. Сёбарˮ сянакобц ӈаниʼ нивыдоʼ юрыбюˮ. Хартоʼ яханандоʼ ӈамгэ вадёнавамʼ, ӈамгэʼ тоˮолха тытоʼ, халэтоʼ танявамʼ, нумда хурка ӈэвамʼ манэсарць ёльце харвобтавэдоʼ. Таремʼ пирувнандоʼ тасалкурць тохолковыˮ. Хареˮ яханатоʼ нянандоʼ сидя юкад вата ӈацекы тохоламбадаˮ манзаравыˮ. Ханяӈы яхаˮна нядаӈгодаӈэ, табекодаӈэ школахана тохолкуртаˮ ӈарка ӈацекыˮ таравыˮ.
«Готовимся к школе» программаʼ пеля вымна мюсертаˮ ненэциеˮ нюˮ едʼ таславы. Сидя поʼ тяхана округнаˮ ӈэвахана мэна ерв вымна ӈэдалёроˮмахад табековнанда ӈадимдевэдоʼ. Тарана иӈудмʼ ты пэртяˮ хартоʼ вадеˮмэдоʼ. Вадандоʼ хара тарцясь: «Нюнаˮ хойхад тоˮмахадандоʼ таминдоʼ падна теневана ӈацекыˮ пондʼ ереберӈаˮ». Падна, толаӈго ехэранаˮ нюдоʼ ӈани нитоʼ пирувна тохолко яˮмадоʼ. Таремʼ мюсертаˮ ненэциеˮ нюˮ тамна харадʼ иламʼ ниня хамедамбадаˮ вэнзерˮ тохолкодаӈэ, ӈамгэхэртмʼ ниня хамедамбадаӈэ тасламбидоʼ. Пуна тамнаʼ тяхаʼ сиддоʼ таремʼ таслаˮмахадандоʼ таминдоʼ нерняʼ ниˮ ӈаˮ. Тедаʼ хойхана вадёданаˮ ӈацекыˮ ӈаниʼ нитоʼ пирувна тохолкодаˮ.
Марина Ярʼ падвы
Сидяӈгˮ: Марина Ярʼ тадтавыˮ
Авторы
Няръяна Нгэрм
Темы