Няръяна Ӈэрм
Тохолкованзь тоˮ
Пилюˮ ирыʼ пудана ялэда пэядˮ. Ханярина илебанаˮ ӈодˮ тевʼ ёльцяӈгана хаця таӈгамзетываˮ. Поʼ сава ёльцьмʼ мэцетываˮ. Ӈэрмʼ някуна иленаˮ тандаяʼ мараӈгытоʼ холкавамʼ ӈатесетыˮ. Сэдорана неˮ сэдъидоʼ пясетыˮ, мятоʼ терˮ еˮэмня пиби, мальци, паны сэдыбасетыˮ. Хасаваˮ тэхэнатоʼ мэсетыˮ. Тудакодамдоʼ нюракутаˮ ты мание тарасетыˮ. Неняӈгˮ, пилюˮ, ниберёˮ тамна яˮавларкаˮ, ӈадьбята тамна ты пэртяхаˮна нядˮмарахаˮ ӈэсетыˮ.
Тикыˮ серонаˮ помна тасиримна малʼ илабтёсетываˮ. Ӈацекыˮ тиртя ӈаноʼ мунмʼ намдабатоʼ сёнзитоʼ мюйˮ тахараӈгасетыˮ. Ӈаворикутоʼ падˮ мале хамэдёсетыˮ. Ибˮ мятоʼ терˮ поӈгана мэванʼ харвабатоʼ теневаˮ: «Тохолко хэсь тара. Школахана нерняӈы илаӈганандоʼ мэˮманда теневабцодамдоʼ хоӈгуˮ. Сяхариʼ ӈарамбатоʼ сидя ӈэтоʼ ниня мэйрё нувандоʼ еˮэмня тохолкова сиддоʼ нядаӈгу».
Ямальской районхана нерденаˮ тиртя ӈаноˮ мале ӈэдалёрмыˮ. Таняна тюку поʼ ӈокханда ёнаркад ватамʼ тэвраванзь мэˮ. Вэбаʼ ирыʼ матдомдэй яляʼ ёльцяндʼ ӈэсыˮмана тиртаˮ. Приуральской районхана харадˮ хэвхана мюсертаˮ ненэцяˮ ӈацекыдоʼ хартоʼ харданʼ хаˮавраӈгудоʼ. Хубтаркавна мюсертаˮ мякˮ тиртя ӈаноˮ ӈамдортаˮ. Надымской районʼ няна ӈобтикы тохолкоди маˮламбиˮ. Тазовской районхана ӈаниʼ тирӈаˮ, выӈгад 955 ӈацекымʼ хосаяӈгуˮ. Интернатханатоʼ илесь лоходоʼ мале хамедыˮ, товаримдоʼ ӈатеˮ.
Ӈэрмʼ терхат нюртей классанʼ хэвандаˮ — 1043 ӈацекыˮ, поӈгадандоʼ 335 — мюсертаˮ ненэциеˮ нюˮ. Ӈокханда 3300 тохолкодамʼ тэвраӈгуˮ.
Нюртей поʼ харданʼ товыˮ ӈахакуд таʼ ямбанʼ ӈарка нидоʼ няць хамековыˮ. Еˮэмняндоʼ «Готовимся к школе» акциямʼ минрець. Маӈгтыˮ ирыхыд пилюˮ ирыʼ пудана ялэˮ ӈэсондʼ школахана, интернатхана мэˮманда илаӈгандоʼ пыхыдадоʼ тохоламбавыˮ. Варемдоʼ мэць буква, цифра хурка ӈэвамʼ тасламбавыˮ, паднабцие няˮамба тоходанвыˮ, пирувнандоʼ толаӈговыˮ, падтаӈгурмыˮ. Тикыʼ хавна хэвы похона Белоярскхана, Ӈэдяӈгана, Паютеˮэхэна, Мыс Каменныйʼ няна самляӈг ирыʼ ямбанʼ еˮэмняндоʼ яӈга тохолковаˮ танявыˮ. Ӈаниʼ нюртей классанʼ хэсь хамековыˮ. Тюку поʼ Аксаркахана, Салемалхана, Новый Портхана ӈобтикы таремʼ ӈацекыдоʼ школанʼ хэвандоʼ нерцюна нядабаӈгудоʼ.
Галина Окотэттоʼ падвы
Авторы
Няръяна Нгэрм
Темы