обновлено: 04:48, 09 сентября 2025
Няръяна Ӈэрм
Тохолковыць
Илебей ненэциеˮ еˮэмня хуркариˮ тохолкова сертабиˮ. Пилюˮ ирыʼ нюртей яляхана Пятигорск маркана «Машук» нюбета форум ӈэвысь. Таняна тодоˮ яхат, маркат маˮлюрмыць.
Тикы форумхана вузхаˮна, колледжхаˮна, школахаˮна ӈацекы тохоламбадаˮ тохолковыць. Таддикахад ӈацекыˮ серо тасламбава манзаяхаˮна мэнаˮ мэвыць. Нянандоʼ таравандаˮ серо тасламбавыць. Ханяӈыдоʼ проектадоʼ манэˮлабтамбавыць. Салехардахад Вера Ивановна Вануйто ӈэдалёрмысь. Намдавыда, манэˮмыда вадеˮядась:
— Мань Саляхардахана «Оленёнок» нюбета садикхана манзарадмʼ. Форуманʼ хэсь харˮн таславась. Сыраʼ интернетхана сайтамдоʼ ходамзь. Пыхыдами пададамзь. Ханярина конкурсхаˮна мэˮмаˮ падрони ӈэдарадамзь. Сиˮми тэравыць, нараʼ няниʼ телефонувна лаханаць. Таʼ неняӈгˮ ирыхыд ныланавамиʼ пэяць, таӈга хаядамзь, сехэрэмиʼ мале ямбась. Тюкоход Москванʼ еся тиртя ӈанохона миӈадамзь. Пуна Минеральные водыʼ няюд Пятигорскʼ ӈэсондʼ поездхана тэвываць. Мэлвахананаˮ палаткахаˮна илеваць. Ӈаволававаˮ, матлавинаˮ хартоʼ яхана ӈаць. Таремʼ илева нянани нюрцямзь.
Хуркариˮ ехэранаˮ ненэциеˮ торомдадамзь. Тодоˮ хардахат товыць. Ямалхаднаˮ товэӈэ сиˮивваць. Ненэй ненэцяӈгат ӈопойдамзь. Сидндет яляʼ ямбанʼ «Машук»хана мэвандаваˮ ӈокась. Нюдяко ӈацекы тохоламбадаӈэ «Воспитатели» нюбетахана мэваць. Ӈаниʼ хартоʼ мэлвидоʼ таняць. Няхаˮна теневабцунаˮ ӈадимдембиваць. Хусувэнаˮ вадеˮмандада, манэˮлабтавандада танясь. Проект сертавыˮ варемдоʼ мэˮӈаць. Ненэйвана ӈока хибяваˮ мутратна иӈудмʼ (искуственной интелект) нядˮмяць манзаравыць. Тарцямʼ ӈаниʼ тохоламбиваць, тад нерняʼ едэй мутрамʼ нядˮмяць ӈацекынаˮ тохоламбаӈгуваˮ. Харта ӈодˮ тикы мэкад ӈамгэ ӈэвы. Манзаяханани таравандадами намдадамзь.
Тохолкованаˮ хавна марадʼ помна сиднаˮ ядэлаць. Яваˮ лэтрамбадиˮ, Ӈарка победаʼ сидндет юˮ поˮ едʼ ӈэда акцияˮ таняць. Ӈаниʼ ӈопой нюрцямʼ — Пэˮ хоёˮ нямна ядэрӈаваць. Поӈгаданаˮ юрˮ самляӈг юˮ ненэцямʼ хэванзь тэраць. Машук пэʼ хойʼ ниʼ танаӈгаваць, пэвсюмзьʼ палаткаханаˮ товаць. Таняʼ ядэроˮмами понʼ тенеӈгув. Проектхавмʼ нидамзь сертабюˮ. Тедариʼ няхатаниˮ тоходадмʼ.
Тиканда илебейˮ ненэцяˮ етриʼ едэй ӈамгэхэˮ тохолкуˮ. Пыдоʼ еˮэмняндоʼ хуркариˮ сертавандидоʼ тасламбиˮ. Варемдоʼ мэтаˮ, несэй ӈавэ намдаванʼ харванаˮ форумхаˮ ханцетыˮ, тюку няваˮ, Вера Ивановна, ӈаниʼ юнда янаˮ ниня ваднанда соӈгу.
Руфина Окотэттоʼ падвы
Сидяӈг: Вера Вануйтоʼ тавы
