Няръяна Ӈэрм
Туда няданда пере
Ярой’ коранда мюня морёхот мята ту тэри хаӈабтырӈа. Сяхаринда тарця ӈэсеты. Иланда ямбан’ сяни’’ по’’ техэ Яндо небя хадахаданда, вэсаконда небяхад ня’’амвы тумда тедалахана минреда. Теда’ Яхоне Тонкывна Яндо’ небяӈэ, хадаӈэ ӈахана хаясь.
Ӈарка пэвдей ирыхына ӈарка ненадумда’’мам’ «Материнская слава Ямала» медальм’ ня’’мась. Округханана’’ ӈока нюм’ вадавы, иланд’ тидхалевы небяха’’ ӈарка ненадо нюбе мипи’’. Тарцям’ Яхоне Тонкывна Тазовской район’ ерв’ ӈудахат ня’’мадась.
Янда тер’’ Давид’ небяӈэ, ӈарка нюнда нюмгана вадецетыдо’. Пыдо’ Тасу яв’ тер’’, Танам’ вымна мюсерӈа’’. Иланди’ ямбан’ вэсаконда — Иван Паскович’ ня манэ’’мэди’ ӈока. Сидти’ иланди’ тидхалемба хибяхарт вата яхад нись нядабю’’. Вэсакоюм’ тэхэната мэсеты, пихий хасава манзаида пэрцеты, Давид’ небя нюда табедамбасеты. Яхоне ма’’нисяв: «Ӈарка нюхунани хадами (вэсакони небя) си’’ми нядабасеты, пуна ӈацекыни мале ӈаркамбойӈэ хэ’’мяхадандо’ харто’ нидо’ манзаяцетыдо’. Тедав, мале тас ненэцяӈэ хэ’’мяхадандо’ сидни’ пыдо’ нядаби’’. Сидя хасава нюхуюни’ ты’ илам’ тэраӈаханзь, нисямди’ нядабихи’, тыди’ нерня’ минреӈгуху’. Не нюни’’ луца манзаям’ минре’’. Нюдя нюхуюни’ яхасаханзь, пыдхартади’ ӈарка ненэцяӈэ хаяханзь. Нябиюм’ Ӈэдя’ школахана ӈацекы тохоламбадаӈэ тара.
Ӈарка не нюди’ Светлана Ивановна Тусида округна’’ тиӈгывна сава юнда пили’’ со. Ямалхана сямянхат сававна ненэй вадамда теневана ненэцяӈэ толы. Луца вадахад ненэй вадан’ лаханаку тэврамби. Небянда нямна тарем’ мась:
— Теда’ небява’’ ӈарка ненадумда’’мам’ ня’’амвада ихинани ӈули’’ пои. Ӈавна сидна’’ табедамба’’мида, тидхалемба’’мида илаӈганана’’ ёльце тара’’. Ӈобкарт вадамда мада’’мами яӈгу. Сидна’’ не ӈацекэӈэ ёльце тяхасовна не манзаян’ тохоламбись, тикахартана’’ таравы’’. Нянда сыраць нердена сэдоӈона’’ сертабинаць, тува’’ пятасетыва’’, корм’ сабыбасетыва’’. Тарця нюдяко манзаяхат, ӈарка серо тидхалемба янамбовна сидна’’ тохолась. Мяна’’ терӈэ ӈули’’ ненадо серӈэ тасламбива’’.
Ёнэй не нюда Диана Ивановна Тайбери Приуральской районхана Аксарка’ лекар’’ мякана манзарана, вадада тарцясь:
— Харе’’ мяканана’’ нюдя нина’’ манзая’’махадана’’, мале небяӈэ хэ’’мяхадана’’ ӈацекым’ табедамба пирӈава’’. Теда’ тасла тикава’’ ӈани’ тарана сер’’ ӈэвы. Таӈок нюм’ вадава нензел’’ ни ӈа’’, тадӈо’’ тамна выӈгана илеб’’. Хусувэй хибяри тарем’ нида пирас’’. Небява’’ маня’’ нюӈэ, саць мэнева’’, сяхаринда ӈодь таӈгонди’ таняб’’, тальня’ мядоманзь турцетыхы’. Теда’ нара’ ӈатеӈахаюна’’.
Тад нерня’ Яхоне Тонкывна — Яндо небя, хада тамна мята ту хаӈарӈая. Вэва мун’’ мято’ хэрабтамбая’’. Мята тер’’ сенз ӈэя’’.
М. Ярой’ падвы
Авторы
Няръяна Нгэрм
Темы