обновлено: 05:59, 04 апреля 2024
Няръяна Ӈэрм
Ты - илнаˮ саирˮ
Хэвы сиˮив яляхана Тазовской районхана ты пэрмаʼ нямна хуркариˮ тарана серо минрець. Сянаковаʼ яляʼ хавна Россиянаˮ тиӈгы яхат товыˮ ӈарка тасалковамʼ мэˮӈаць. Таняна тэхэˮна мэнаˮ Национальной Союзʼ терˮ ӈобтʼ маˮлюрӈаць. Ӈарка лахарёдоʼ ты пэрмаʼ хавна халядаваʼ нямна ӈась. Ӈокханда юкад вата тет яхад серо теневанаˮ, хареˮ яханандоʼ тыʼ иламʼ нерняʼ пэртяˮ товыць.
Ты пэртиˮ Национальной союзʼ ӈэвахана мэна Михаил Яр таремʼ мась: «Вакна ты пэрмахана хусувэй поʼ тэнд хэва суворӈа, нябтипой хурка ӈэвахаданда маниер. Ямалваˮ сяхаринда ӈаниˮ ёˮ терˮ поӈгана ӈадьсеты. Тамна тяхаʼ илнаˮ саирмʼ лэтраванаˮ, минреванаˮ еˮэмня илебей ненэциенаˮ тэхэˮна мэбатоʼ сероˮӈа. Пыдоʼ сава иландамдоʼ вуни ӈатеӈгуˮ, хартоʼ нерняку ӈэбатоʼ тара, хареˮ яндоʼ едʼ ӈарка таромʼ хаˮаврамбабатоʼ, тикахана таравамдоʼ хамедаӈгудоʼ. Ханзерˮ яхананаˮ ты пэртинаˮ нядабававаˮ ӈаниˮ яхаˮна иленаˮ ты пэртяˮ теневабтоʼ тара, масиˮ пыдоʼ яханандоʼ ӈаниʼ таремʼ сертаӈгудоʼ. Маняˮ, ты пэртяӈэ, ханзерˮ нерняʼ миˮмахаданаˮ теневаваˮ, ненэциенаˮ таняˮ».
Ямалхананаˮ выӈгана иленаˮ иламʼ тидхалемба хуркари едэй мутры нядˮмяӈаˮ. Ты пэртинаˮ, халяданинаˮ тасла яˮамна серотоʼ танябˮ, хуркари луца мутры мэць падна пирӈаˮ. Ӈэдабтавы вадидоʼ минхаˮ тидпойʼ тасламбидоʼ. Тикыʼ хавна сидя поʼ тяхана округхананаˮ «дорожная карта» нюбета падармʼ ты пэртиˮ ватовна яӈгамдадонзь, едэй нядˮми ӈадимдець. Таремʼ сертаˮмахадандоʼ тыʼ ӈамзаʼ мирˮ яӈгамась. Илебей ненэциеˮ мядʼ терˮ няхаромдэй нюдоʼ хоˮмахадандоʼ ея мядʼ капиталмʼ няˮмарпиˮ. Тюку яляʼ пиркана мале 268 мюсертаˮ капиталмʼ еˮэйӈаць. 2017 поход тамна ӈаниˮ хуркариˮ яёло мюсертаˮ ненэцяˮ няˮмарпиˮ, ирыхына самляӈг ёнарˮ есямʼ тамбиˮ.
Ты пэртиˮ Союзʼ манзая
Няби яляхана Союзандоʼ терˮ ӈобтʼ маˮлюрӈаць. Таняна пяванда манзаямдоʼ тасламбиць. Союзханандоʼ Россиянаˮ тиӈгы 20 ты пэртяˮ яхат ненэцяˮ мэˮ.
Михаил Погодаев, Якутияхана ӈэрмʼ терˮ серо тидхалембада министрʼ марцьхэӈэ тарана, мась: «Союзваˮ тодо яхана иленаӈэ сиднаˮ ӈобтʼ пэрпата тара. Яхатанаˮ хаˮморта иӈудонаˮ яляʼ няюʼ ӈэда законʼ саирӈэ, ныхыӈэ ханˮӈаяˮ. Таремриˮ ты пэртинаˮ илаʼ саирмʼ лэтра пиртаваˮ».
Нерняӈы манзаитоʼ нямна Михаил Яр таремʼ мась: «Союзваˮ тодо яхана иленаˮ ты пэртяӈэ сиднаˮ ӈопой неданʼ хаˮаврабата тара. Ты пэрмаʼ иламʼ нерняʼ минреванʼ харванаˮ ненэциенаˮ ӈобкана мэбатоʼ сероˮӈаˮ. Манзаяваˮ тяхасовна ӈадимдембабанаˮ тара. Хусувэй хибяри хареˮ яхананда ты пэртита еˮэмня варемда мэˮӈаяˮ. Ӈобкана хареˮ яхананаˮ таславы серонаˮ тидхалемба пиртынаˮ. Хибямдоʼ ӈамгэхэна няда тарабата, ӈаниʼ таслаӈгуваˮ».
Алексей Лиманзо Сахалинʼ няд товы вадада тарцясь: «Союзваˮ сиднаˮ ӈобт маˮлаванда хавна илаӈгана таранаˮ иӈуд тэврамби. Яхананаˮ тедаʼ манэˮмынаˮ, намдавынаˮ манзаяхананаˮ таромʼ хаˮавраӈгуˮ».
Тикыʼ хавна союзхандоʼ едэй ненэцие няˮмаць. Правленияхана мэвандадамдоʼ таслаць. Анадырь маркана ӈэвы Съездхана ӈамгэʼ тоˮолха серо ӈадимдевамʼ хэтаць. Тад нерняʼ ӈамгэмʼ пэрмамдоʼ вадеˮӈаць. Таремʼ ты пэртяˮ Тасу явʼ няна тасалкурӈаць.
Марина Ярʼ падвы
Сидяӈгˮ: М. Ярʼ тадтавыˮ
