обновлено: 03:44, 23 июля 2026
Няръяна Ӈэрм
Тыˮ пардонˮ ларас
Ты пэртяхаˮ тедаʼ поʼ самляӈг юрˮ мянʼ тыˮ пардонˮ ларасмʼ митаˮ. Яӈганаваʼ ёльцьӈгана тыˮ лекарˮ тикыдоʼ хартоʼ ӈэсыʼ терхаˮ тэволаӈгудоʼ.
Митерпадаˮ пардонтоʼ лабтэйˮ ӈаниˮ похот манэць яӈгаˮ. Тедаʼ ларасакудоʼ хойʼ няна мюсермаʼ мальӈгана нива саˮневоӈгдандоʼ еˮэмня мэё неракоход сертавыˮ. Тердоʼ ӈодˮ техэˮ похотатоʼ пансаркаˮ. Ӈокханда мюняндоʼ сидя юкад вата самляӈг пардонˮ тэнзˮ ӈаˮ. Ханяӈыдоʼ тыʼ сёнзяʼ мюй хабцяӈо савумдамба мэтаˮ. Тыʼ тобаʼ хадеро масыба, мерю савумдамба мэтаˮ ӈамгэˮ таняˮ. Неноховавна епдяхана неняӈгахат, пилёхот ты лэтрамба таранаˮ ӈамгэˮ мэвыˮ. Тикыˮ пардонхаˮна ханзерˮ тымʼ лекарабта таравамʼ хусувэй тэсавэй ненэцьʼ мянувнанда хамэдамбида.
Пилиˮ нерденаӈэ ларасаку Пэˮ нямна мюсертаˮ няˮмарӈаць. Неняӈгˮ ирыхына тарця тыˮ лекарˮ пардонˮ лабтэйˮ ӈаниˮ яхаˮ тэваӈгудˮ. Тыˮ пардонˮ хойʼ терˮ ненэцяˮ хардахаˮнатоʼ няˮма ӈаниʼ пирˮӈаˮ.
Нюдяне Махакуйʼ падвы
