Няръяна Ӈэрм
Ты пэрма
Ты пэртина’’ иландо’ сибё ӈэва’ е’’эмня округханана’’ нядаӈгода’’ ерв’’ манзара’’. Поӈганандо’ хуркари’’ таня’’. Тарем’ ӈод’’ вы’ тер’’ иландо’ ни яӈгавор’’. Хусувэй мэва’ ервото’ ня’ таславандидо’ ӈадимзеты’’.
Хахаяда яля’ Шурышкарской районхана ты пэртито’ ня ӈарка тасалковам’ мэ’’ӈаць. Тикадо’ тэхэ’’на мэна’’ ненэцието’ нерняӈы’’ ялэ’’ нямна ӈась. Тасалковаханандо’ районандо’ ерв Олег Попов няби Россияна’’ ты пэрти’’ Союз’ ӈэвахана мэна Михаил Яр мэ’’ӈаханзь. Округханана’’ ты пэрма’ нямна манзарана’’ ерводо’ ӈани’ таня’ тэвормыць. Районханандо’ тэхэ’’на мэва ӈобтикы саць тарана ӈамгэ, ӈэрм’ тер’’ ила’ саирм’ лэтрамбада паӈгаӈэ тара. Тикым’ няд’’мяць яханандо’ хаби’’ невхы иландо’ саирм’ нёда’’, харе’’ вадидо’ лэтрамби’’. Та’ Пэ хой’’ ядхана мюсерӈа’’, сыв’ пэдари’’ поӈгана иле’’. Пыдо’ ненэй ненэця’’ тотрев’ таӈок харе’’ иленадо’, мюсертадо’ яӈгу, тэсавэйдо’ совхозхана манзара’’, харто’ ӈавкыдо’ луца’’ ты’’ поӈгана вадабидо’.
Теда’ ӈобт’ тэвор’’маханандо’ тюку’’ ялэ’’ пиркана ты пэртито’ ил’ хурка ӈэвам’ ваде’’ӈаць. Яханандо’ ненэся тыто’ хадо’’ сава ӈэвы’’. Ёря нядэй няд’’мяць суюдо’ сяхаринда сававна вадабидо’. Тарем’ ӈод’’ вэва нумӈг’’ тоса’’, сэрад’’ танясеты’’, тикы’’ янхад ты’’ хадо’’ салаби’’ ӈылна хаё пирӈа’’. «Мюсерта’’ ненэця’’ мывдахавабто’ вэва нумли сиддо’ таӈыламда пирта», — тэхэ’’на мэна’’ харто’ тасламбидо’. Ӈэрёй хабартавамдо’ ӈани’ тензебтедонзь. Ханзер’’ тад нерня’ манзаравамдо’ тасламбиць.
Ты пэрти’’ серо теневана Михаил Едэйкович хаби’’ яханандо’ тыдо’ лэтрава’ нямна инда ядэробцо хэтась. Пыда пэдарахана ты пэрмам’ сававна теневада, ӈадьбята вадида ӈули’’ яхандо’ ха’’морӈаць. Няхата тамна тяхасовна ты пэрмам’ ваде’’ӈась.
Тасалко’’махадандо’ ты пэрма’ манзаи’’ тид’’ маниебцохондо’ ӈобкана тэвыдаць. Ӈоб’’ иры’ хэ’’мяхад ӈани’ ӈобт’ тэваӈгуд’’. Тикадо’ ты пэрти’’ пирдырма’’ ялэ’’ пиркана ӈэӈгу.
Автор: Марина Ярой’ падвы
Авторы
Няръяна Нгэрм
Темы