Няръяна Ӈэрм
Ты пэрма – иланда паӈг
Степан Тяро — ты пэртя. Нюдя ӈэванда мальӈгэхэд тэхэˮна мэсь торомбэй. Тедаʼ Нядаӈгарадʼ няна иле. Нареʼ харадʼ хэвхы выӈгана мюсерӈа. Мята терˮ невхэхэд Путиˮ еркарахад паӈгдыˮ. Пыда ирината теневабцу илаӈгананда нядˮмаӈэ мэˮэйда.
Тикыʼ хавна ӈарка таромʼ едэй мутрахат ӈаниʼ хомби. Гордей няби Мартин хасава нюхуюда тамна нёлёкоцяхаʼ. Тедариʼ Сандра небяндиʼ хэвхана мэсетыхиʼ, ялэˮ ямбанʼ сянакурцетыхиʼ, ныхытиʼ пирувна мядʼ манзаи сертаба нядаӈгосетыхиʼ. Таремʼ ӈодˮ нисядиʼ хахая ӈэдалёрпата ӈаркаюмʼ хасава нюмда мале нянанда ханласетыда. Тыдиʼ маˮлаванзь, поӈгадиʼ, яӈгодиʼ манэˮманзь ядэрцетыхиʼ. Хасава нюда нюдя ӈэбта ӈодˮ хамедамбида: «Ӈэрм яхаданаˮ сава я яӈгу».
Степанʼ вадавна, хусувэй ненэцьʼ нерняӈы иламда харта яляʼ няюʼ тидхалембида. Тедаʼ вадёдана илебей ненэцяӈгˮ тарцяˮ табекомда мэˮӈа: «Тамна ӈока поˮ ямбанʼ харˮнаˮ янаˮ нина невхы иринанаˮ недарми нёдахаваˮ. Яваˮ сянзь тынаˮ вадабахаваˮ. Харˮнаˮ нюнаˮ еˮэмня яʼ сярʼ ниймʼ хабтоӈэ лэтамбахаваˮ».
Галина Окотэттоʼ падвы
Сидяӈг: Александра Тяроʼ тавы
Авторы
Няръяна Нгэрм
Темы