Няръяна Ӈэрм
Ты пэрти’’ ялэ ӈатева’’
Тюку по’ округна’’ тиӈгывна ӈэда’’ Ты пэрти’’ яля’’ яра’ иры’ 22-23 яляха’’на пэӈгуд’’, тикахад сидя иры’ ямбан’ минда’’. Нерня яна’’ тер’’ Нядаӈгардан’ ма’’лёда’’, тамна пунарка’ ӈани’’ хардаха’’на.
Нядэй я’ няна сянакова’’ ялэдо’ мале таславы’’. Ты’’ саполана иры’ 15 яля’ Ныда’ няна пирдырта’’. Сие ниць иры’ 12 яляхана Нори хардахана ма’’лёда’’. Кутопьюган’ тер’’ хэбидя ялямдо’ сие ниць иры’ 19 яляхана мэтадо’.
Пуровской районхана тарця ӈэӈгу. Тарка Саля’ тер’’ сянакова’ ялэдо’ ты’’ саполана иры’ 1-2 яляха’’на мэць пяӈгудо’. Ты’’ саполана иры’ 12 яляхана Харампур’’ тер’’ ӈарка ялямдо’ мэта’’. Шурышкарской районхана илена’’ Мужи хардан’ ты’’ саполана иры’ 14-15 яляха’’на ма’’лёда’’. Ратта хардахана ты’’ саполана иры’ 15 яляхана сянакурта’’. Тикы’ пуд ты’’ саполана иры’ 21 яля’ Халясавэй’ няна ӈэдалё пирдырта’’. Тад хуняна Ханымей няби Толька’ няна харад’ тер’’ няби ты пэртя’’ нидо’ манэта’’. Красноселькуп’ няби Самбург’ тер’’ ты пэртя’’ ты’’ саполана иры’ 29 яляхана сянакода’’.
Новой Уренгой’ няна ты’’ саполана иры’ 8-9 яля’’ пирка’’на ӈобт’ тэваӈгуд’’. Ноябрьск’ няна ты’’ саполана иры’ 15-16 яляха’’на ма’’люрта’’. Саляӈгардахана нина’’ ты’’ саполана иры’ 22-23 яляха’’на манэтына’’. Муравленко’ няна ты’’ саполана иры’ 29 яляхана мэсь тараӈгу. Аксарка няби Тазовский хардан’ хэван’ харвабта’’, ты’’ саполана иры’ 29-30 ялэ’’ нерцю’’ таня’ ӈэдалаӈгуда’’.
Яр-Салян’ тэваван’ харвана’’, сие’’ ниць иры’ 5-6 яляха’ нерня хамэдёбто’ серота. Антипаюта’ выӈгана илена’’ сие ниць иры’ 10-11 яляха’’на пирдырмамдо’ мэтадо’. Панаевск’ няби Новой Порт’ сянакова’ ялям’ ханзер’’ мэ’’мамдо’ сие ниць иры’ 12 яляхана манэць пиртара’’. Сямянхат пуняна Ӈэдя’ няби Сёяха миӈаха’. Таняна сие ниць иры’ 17-18 яляха’’на няби сие ниць иры’ 19-20 яляха’’на ма’’люрта’’.
Тарем’ ӈэӈгу’’, ни’’, тедари’ пунси, ненадовна хэтвы вада ни ӈа’’, харвабта, несэймдавандадо’ ӈэдакы, тикым’ нум’ тасламбида.
Анна Яптик’ падвы
Сидяӈг’’: М.Яр’ тадтавы’’
Авторы
Няръяна Нгэрм
Темы