Няръяна Ӈэрм
Ты пэртидоʼ ӈобтʼ маˮлюрӈаць
Тёняӈы Санэроˮ республикахана ты пэртяˮ маˮлюрӈаць. Воркутаʼ маркана хусувэй поʼ ӈэрёʼ няна ты пэртидоʼ пирдырмаʼ ялямʼ мэˮӈаˮ. Тюку поʼ ӈаниʼ таремʼ ӈобтʼ тэворӈаць.
Ямалхаднаˮ таняʼ ӈэдалёрмыˮ нинаˮ ханзерˮ сянаковаʼ яляндоʼ хэвамʼ таремʼ вадеˮӈадонзь. Алексей Салиндер маˮнисяв:
— Ты пэртитоʼ сянаковаʼ яля тидпойʼ еˮэмняндоʼ таславы ни ӈаˮ. Тикадоʼ несэй хэбидя яляʼ мюня ӈа. Тарця сянаковаʼ ялямʼ ӈокамʼ манэˮӈадамзь, ихинани, сямянхат сава маняˮ округхананаˮ минрейдоʼ. Таняна сянакова ялядоʼ ӈобˮ яля миӈа. Яханаˮ манэць ӈулиˮ ӈамгэхэрт тоˮолха ни ӈаˮ.
Харданʼ тэхэˮна, мерета есяʼ ханхаˮна турӈаˮ. Сямянхат харвабтана пирдырмадоʼ ныхыдырма ӈэвы. Таняна сырта ӈокась. Ненэцяˮ мальцятаˮ, ханяӈыдоʼ паркасиˮ нерняʼ ӈадиберӈаˮ. Тёрхавадоʼ яˮавлыˮ. Поӈгнандоʼ маняˮ Ямалнаˮ терˮ таняць. Пыдоʼ — Пэˮ нямна мюсертаˮ. Ӈобтикы нитоʼ поӈгана ныхыдоʼ хорпиць. Ӈэдалёдиˮ пирдырмамʼ ӈаниʼ харвобтавэдоʼ. Таняхавана сыртаˮ харадʼ терˮ ӈокаць. Ӈэдалёди сидладˮмана ӈэдарамбидонзь. Ярколавахана ненэцяˮ ёльце тянёць. Тэри ӈобˮ сидя сырта ӈэвы ӈэӈгу. Сабе ӈока сянакованʼ харвана яӈгусь. Таняна тамбада ӈудитоʼ терˮ ӈулиˮ хумбанзядаˮ. Ваˮавʼ тохоця, ваˮавʼ синдаˮмяˮ, тамна ӈаниˮ таросядаˮ ӈамгэˮ, тыˮ ӈэхэна нерняʼ хаˮамна юрˮ ёнармʼ няˮмарпи. Тарцямʼ теневанаˮ пирдырманзь ниˮ тэяˮ.
Таремʼ ӈодˮ яʼ тяхамбавыˮ нидоʼ мание саць маямбиˮ. Янаˮ терˮ сиднаˮ тумдыбиць.
Ледков Григорий, Воркутаʼ няна мюсерта ты пэртя вадада тарцясь:
— Маняˮ хусувэй поʼ турӈаваˮ. Сяхаринда Ямаланʼ сянаковаʼ ялянʼ ӈаниʼ ханцетываˮ. Таняхавана ёльце сава. Тамбада ӈудаʼ терˮ илаӈгана таранаˮ ӈамгэˮ ӈэсетыˮ. Тюконʼ хахая иленаˮ янаˮ терˮ турӈаˮ. Таремʼ ӈодˮ хусувэй поʼ ӈокворӈаˮ. Маняˮ ӈани сянакова ялямʼ ехэра, тюконʼ турӈаваˮ.
Тарця сянаковаʼ ялямʼ Воркутаʼ няна мэˮӈаць.
Автор: Марина Яройʼ падвы
Авторы
Няръяна Нгэрм
Темы