Няръяна Ӈэрм
Ты пэртяˮ хабарта пэядˮ
Носиндалаваʼ ирыхана выӈгана иленаˮ ты пэртяˮ ненэцяˮ хабарталвахаˮ ханаванда тэдамдоʼ тэрасетыˮ. Ёльцянда томбˮ, тэравы тыдоʼ харданʼ танаӈгудоʼ. Тедаʼ Ямальской районхана ты хабарпава мэлвидоʼ мале хамэдавыдоʼ.
УХК «Юрибей» нюбета мэлвахана носиндалва ирыʼ нюртей яляхана манзара пэӈгудˮ. Яр-Саляхана няхаромдэй яляхана нэӈгудоˮ. Сёяхаʼ хардахана сидя юдимдей яляхана забойкамʼ пяӈгуˮ. Мэлвидоʼ хамедавыдоʼ. Тоенана манзаямʼ пяӈгуˮ. Ӈулиʼ тэтанаӈгуˮ. Тыˮ лекарʼ ӈодʼ ни таӈгаӈгуˮ. Пыдоʼ хусувэй тымʼ манэсартаˮ.
Сидя юˮ поˮ пирʼ тяхана Сергей Окотэтто манзараˮмамда тензебтембидась. Пыда таремʼ вадеˮӈадась:
— Нюртей забойный комплекс Сабетта хардахана ӈась. Мале ӈока поˮ хаяˮ. Тамбейʼ няби Сабеттаʼ хэвхана выӈгана илениˮ ты маˮламбасетыˮ. Сёяхаʼ хойʼ няд тэвравэдоʼ тянёсь. Хасава юˮ ёнарˮ пирˮ ӈэвакы. Теˮны мэлвахабидоʼ ехэрын. Мань таняна яхананаӈэ тарадамзь. Туша ӈыдахаяˮ маторпинаць. Матормы ӈамзи ӈамгэриʼ ниʼ лехэбтаˮмахад ханибтембинаць. Нерня етя малкодаˮ тодоˮ ӈысыхыт таняʼ тэвраванда тэдамдоʼ яркыбасетыˮ. Тикы тэравы тыдоʼ ёˮмаӈгадандоʼ, харданʼ минревандоʼ ямбанʼ толабасетыдоʼ. Вадʼ ӈэсондʼ таремʼ танабасетыдоʼ. Нёʼ сихиня сидя ненэцьʼ сыртаӈэ нусетыхыʼ. Вакана тыдоʼ ӈаниʼ толаӈгудоʼ. Тытоʼ хэвня санармоӈгад паромбарка манзарасетыˮ. Ханяӈэхэˮна хад нумгана минревы ӈэбтоʼ, тытоʼ пеляˮ яʼ поӈгана хаюрць пэрӈаˮ. Тикы хаёвыдоʼ хосаяванзь ханцетыˮ. Тэвраˮмахадандоʼ ӈаниʼ толасетыдоʼ. Тыˮ лекарˮ таминдоʼ тыдоʼ манэˮсарцетыдоʼ. Сян хаӈгуртамʼ хобатоʼ падартʼ падаӈгудоʼ. Вынхалуйдоʼ ӈаниʼ тэрабасетыдоˮ. Тад пуна хабартанаˮ пэӈгудˮ. Пыдоʼ хартоʼ мэлвадоʼ танясь.
Тедаʼ тарана юнмʼ намдадмʼ. Ханзерˮ забойкамʼ ӈаˮиʼ хэвы похоˮна минревэдоʼ. Тюку поʼ ӈопой ёнарʼ тонна тыʼ ӈамзамʼ сертаванзь тасламбиˮ.
Р. Окотэттоʼ падвы
Сидяӈг: А. Яптикʼ тадтавы
Авторы
Няръяна Нгэрм
Темы