Няръяна Ӈэрм
Ты пэртя’’ илм’ юне’’лабтамби’’
Нямэхэна ненэй ненэцие’’ ил’ нямна ӈэда кином’ манэ’’лабтамба пяць. Нюмда «Мяд’ паӈг». Нюртейӈэ Саляӈгард’ терӈэ манэ’’ӈаваць. Пуна Нядаӈгарад’ няна Ты пэртя’’ сянакова’ яля’ мальӈгана маниедонзь. Тандая’ Панаевск’, Сёяха’, Яр-Саля’ терха’’ ӈадимдевэдо’.
Ханярина культура’ мяка’’на ма’’люрӈаваць. Саляӈгардахана «Мяд’ паӈган’» сырмана’’ мальӈгана мэ’’ма лабэсава’’ пан’’ӈась. Ӈани’’ хардаха’’на ӈобтикы тарцясь. Маня’’ тадтамбавы’’, нядаӈговы’’ ненэцие’’ ня’, проектм’ минрена Галина Матарас’ ня’ кином’ ӈобкана маниеваць. Хэвы ныланава’ яляхана Яр-Саляхана «Яля’ сэв»м’ нюбета мят’ ӈани’ ханяӈыдо’ тэвормыць. Юрибей’ вымна мюсерта’’ нидо’, райондо’ ерво, хардандо’ тер хамыць. Галина Ачембоевна ӈуда’ терсавэй товысь. Нядаӈговы’’ няхата сямян сава вади мэ’’ӈась. Пыда ма’’нисяв’’:
— Тюку серкана таравы ёльце ӈока. Няд’’мадва’’ харто’ индо’ сер’ манзаранахат, факториям’ ня’’амбадахат, ты пэртяхат, «Ямал»м’ нюбета общественной движенияхад хомбиваць. Тадтавына’’ ӈобт’ ма’’ламбавы’’ нина’’ пэртадо’ ӈани’ тоенась. Хусувэй хибя нядаӈгусь. Выӈгы илаӈгад ехэранина’’ иры’ вата’ ямбан’ хой’ няна мэвам’ пирдалець. Тадтамбуванзь тэвравына’’ яӈга мядо ниць мэс’’, мюсерта’’ нито’ тотрев’ илець. Ӈобнзер’ нивы ӈэб’’на’’ ӈа’’, тарця нись ӈадимд’’.
«Мяд’ паӈг» Юрибей яха’ хэвхана, Ямальской районхана 2021 похона тадтавы. Владимир Тумаев’ сертавы. Таняӈы’’ ё’’мана мюсерта’’ илам’ манэ’’лабтамби. Ненэй ненэця’’ ил’, хэвняд ховы иӈудм’ нивы’’ мэс’’. Хусувэй яля’ ӈамгэм’ пэрцеты’’, ханзер’’ илесеты’’ — тикым’ ваде’’ӈа. Ӈацекы ненэцие’’ тохолкованзь хан’’мам’, ӈояк’’ мякато’ пуня’ турман’ харвавам’ ӈадимдемби. Теда’ ненэся ханяӈы’’ хардан’ харва’’, несэй иланд’ выкта’’, выӈгана илеван’ харвана тянёмдана. Тохолко’’мандо’ пуд мякато’ ни’’ тур’’.
«Мяд’ паӈг»м’ маниевы’’ индо’ ядэрабцо’’ хуркариць. Пыдо’ ма’’нисям’’:
— Ӈавна туна’’ яӈговы ӈэб’’, илма’’ яӈгодась. Невхэхэд илма’’ тум’ пятабадарихит пере. Теда’ не’’ выӈгана хаюрман’ ни’’ харва’’. Тад нерня тикы сер’’ саван’ сидна’’ ни тэвраӈгу’’. Тунд туп’’, мят’ мюй панта. Ту’ хабтёб’’, мя’’ хаваӈгу, ненэць’ еркрада пилибт’’ ёхода. Ты пэрма ӈули’’ тоенана манзая. Хорамд пятавнданд, ӈацекыд ембпаданд, ӈамгэрид тырабтамбданд яӈгоб’’, тэхэ’’на мэсь нир пират’’, илар нерня’ ни минд’’.
Ты пэртя’’ нямна ӈэда кино’’ сертаба тара’’. Ханзер’’ илевава’’ я’ тиӈгывна манэтадо’. Инда’’ ядэрабцо’’ таняб’’, ялян’ ӈадимдембида’’.Тюку илаӈгана сава иӈудм’ хомбади ханзели’’ нядабидо’. Еся’’ няд’’мам’ ханярид хось пир’’ӈада’’. «Очаг» культурам’ нерня’ пэрта президентской фонд’ еся няд’’мяць ӈадимясь.
Автор: Анна Яптик’ падвы
Авторы
Няръяна Нгэрм
Темы