Ты пэртя’’ нисянадо’ пыда’’

Саляӈгардан’ сёбар’’ ненэця’’ турӈаць. Ӈэрм’ тер’’ сянакубц тэнз’’мана пирдырӈаць. Пыдо’ яна’’ тиӈгывна ӈэда тодо’’ районхат товыць. Сянаковы’’ поӈгана тохолкода’’ ӈацекы’’ ӈани’ мэць.

Сюрмбахая няхар’’ мэва санарма’, сюрберма’, тубкам’ моёпава’ пуд ярколава ӈась. Хубтахана ю’’ час’ пиркана сёбар’’ мале тынзяӈодо’ ня’’маць. Пирдырта маниенаӈэ, тидхалембадаӈэ тарана’’, тэри сырманзь товы’’ Лар яха’ варан’ ма’’лыць.

Тынзя’’ минаць хан’’ӈаць, тюр сяни’’ мэва мяра’ мюня хаюрӈась. Хусувэйндо’ ӈудида тынзям’ санопа торомбэяць. Сямянхат ӈокавна тюрм’ ярквэхэваха’ Евгений Вануйто няби Вадим Вануйто ӈэвэхэнзь. Сидябты’ Ямальской район’ Яр-Саля’ харад’ терха’. Пыхыдади’ «Лидер»м’ нюбета спортшколахана тохоламбиди’. Евгений чемпионатхана нерня’ ха’’мыць, Вадим — 16-17 потна’’ поӈгана.

Тасу’ я’ няд товы Виктор Сегой ӈани’ варемда мэ’’ӈась. Пыда няхаромдэясь. Вадавнанда сяхаӈгарт’ яркулавахана нерня’ нивысь еребер’’. Ӈули’’ мэненахаюда тубкам’ моёпава няби сюрмбахая няхар’’ мэва санарма. Теда’ ӈод’’ сававна санавыць, ӈобтикы няхаромдэй. Таремгав’ Тасу’ я’ терӈэ матдонзь. Виктор Сегой’ хавна чемпионатхана Вячеслав Салиндер, Эдуард Яр, Ксения Тэсида мэць. Никита Яр няби Алёна Лапсуй школахана тохолкода’’ нити’’ ӈар’’ поӈгана пирдырӈаханзь. Алёна сюрмбахая ӈопой яхад няхар’’ мэва санавахана няхаромдэй ӈэвысь. Сиддо’ тидхалембададандо’ «Мастер спорта России» нюмам’ мэта Владимир Пяк тара. Пыда по’ пирт’ тарця манзаям’ минре. Ма’’нисяв, тикы сер’’ ёльце ихинанда пои. Пыхыдадо’ тохоламбван’ харвана’’ ӈод’’ таня’’. Не ӈацекэри’’ тянёрка ӈэвам’, нива ӈадибермам’ хэтась.

Фото: Анна Яптик / Няръяна Нгэрм

Тикы яля’ пэвсюмя’ няна мер’ мякато’ хэванда’’ Тасу’ я’ тер’’ няби Пяку’’ яхад товы’’ хано санарпиць. Нита санарман’ Эдуард Ярм’ лаханако ня’’ӈадамзь. Пыда тубкамда ӈаха’’ мовысь, няхаромдэй ян’ ха’’амвыць. Тарця вади мэ’’ӈась:

— Ӈэрм’ тер’’ сянакубц’’ тэнзха’’ небо’ 2025 похона тэвываць. Тандая’ пыхыдами тохоламба пявась. Тикы’ нерцю’’ сюрберцетыдм’, пирдырмаха’’на мэсетыдм’. Си’’ми тохоламбадами си’’ми хаӈась, ма’’нив: «Сюрберпат ӈули’’ мере’’ӈананё, няна’’ туӈэ’’». Мань пуня’ нидамзь ӈа’’. Тюкохона ӈод’’ сюрберма нянани нензел’’. Яркулавам’ ӈани’ пир’’ӈав. Сямянхат тоенанахав хано санарпава ӈэва’ сер’ ӈа.

Ӈэрм’ тер’’ сянакубц’’ тэнз минрена’’ ненэцие’’ ӈокаюм’ пеля выӈгана вадёвы’’ ненэця’’. Нюдя ӈэдахандо’ нисянадо’, небянадо’ хой’ няӈы иланд’ тохолавыдо’. Ӈадьбята вырэйвана ныхымдо’ нись сяй’’ нерняри’ ӈэсь пэрӈа’’.

Автор: Анна Яптик’ падвы

Авторы

Няръяна Нгэрм

04:30, 16 февраля 2026

Темы