Няръяна Ӈэрм
Ты’ тар’ таром’ ховы’’
Ямална’’ тиӈгэвна хабартаӈгова’ мальӈгана ӈока ты’ хоба’’ ма’’лёсеты’’. Юд’ мян’ по’’ тяхана ӈояк ненэця’’ мяд’ ея’ хобаӈэ, хонё мэта пэӈаӈэ, ӈэдалёсь’ ӈамдёрцяӈэ, нароӈэ, ханото’ синд’’мяӈэ ханасетыдо’. Тарем’ я’ таборӈэ вуни’’ тараӈгу’’. Теда’ ты пэртя’’ хабарманзь ми’’мы’’ тэхэтато’ ӈамгэхэртм’ ни’’ хомбю’’. Мал’ ханяхавана таромдо’ хомби’’.
Тандая’ ӈопой сава юнм’ намдаваць. Си’’ив Харв’ няна ты’’ таре няд’’мяць сырэй’’ ӈавори сертаби’’. Тикым’ Владислав Мулявин тидхалембида. Обская станция нюбета хардахана манзара’’. Сэдъяханато’ тараванда’’ таре нерде хобахат пюдыбидо’. Вэяхат, юркад, тамна хуркари’’ варкат, ӈабтхат халтамбидо’. Тэри ланзякм’ ни’’ мэс’’. Яӈга таславы ит’ мэхэя вародо’ ха’’аврамби’’, пывумдамби’’. Тяхасовна тырабтамбидо’. Тарем’ сертавы’’ тарканато’ сабвы’’ паддо’ ӈани’’ ё’’ ня’ ӈэдабтамбидо’. Таняна сэдоранидо’ ты’ тарм’ мэё тохос’ ни’ мэмбидо’. Тад пуна тикы тохокад тецьдахана мэ’’манда’’ ембдяро сэдыби’’. Пюдвы хоба’ нярахад хуты’’ ӈылдад паркыби’’. Ӈобкарт’ няра’ ютек ни хаюр’’.
Сидндет по’’ ямбан’ ты’ таркана мэйравы тохокад сэдвыдо’ хуркари’’ тэнз’’: мальця’’, ханена’’ ембдяр’’, сава’’, ӈоба’’, хэбицяко’’ пива’’, хонё мэта’’ то’’. Тикы’ хавна ея сэдыба пявы’’. Вадавнандо’ ненэй таретейхат саӈгомдо’ тянёрка, ю’’ яӈорэй’ пирувна сибё’’. Тамна няндо’ сыра ни палаӈг’’. Ты’ тар’ мюй’ хоркадёсавэй’’ ӈэвам’ ӈули’’ саву’’ӈадо’. Ма’’ним’’, сэдвы’’ паныдо’ са’’невы’’ ӈэбто’, мер’ тыраӈга’’. Варо’’мы’’ ӈэбто’, машинкахана халтаб’’, ни’’ вомд’’. Няра мальцям’ тарем’ вунир халтаӈгу’’. Нялеӈгу нив’’.
«Мань Юрибей’ хабарталвахана ӈока по’’ манзарадамзь. Тамальӈгана хаюрта’’ хоба парадамбасетына’’. Ини ӈыламна хамедамбивась: ёльце сава ӈамгэ’’ тэри хан’’ӈа’’, ханзеркав’ тародамдо’ хось тара. Янамбовна тарця серт’ тэвыв’’. Теда’ ты’’ таркана сабвы’’ ембдяро мале ӈока ненэця’’ мэ’’эйдо’. Омскхад тэмдормы’’ альпинист’’ вадавна, едэй паныдо’ ӈули’’ иба’’, сибё’’. Ӈопой ты пэртям’ лахана ня’’ӈадамзь, пыда сэдвы мальцява’’ серхая хаця пивна ядэрӈась. Ма’’нив’’, ёльце сава, ненэй мальця’ пир’’, ӈопой, саӈгомда яӈгу», — юне тэволанаха’’ Владислав Мулявин минрена манзаянда нямна тарем’ лаханавысь.
Ты’’ саполана ирыхына харто’ «сайт»амдо’ сертаӈгу’’. Тодо’’ я’ тер’’ таняд тэмдорць пирта’’. Сата тецьдаха’’на серуванда панэдамдо’, пивадамдо’, тамна ӈани тарана ӈамгэридамдо’ хоӈгу’’.
Автор: Галина Окотэтто’ падвы
Авторы
Няръяна Нгэрм
Темы