Няръяна Ӈэрм
Тыˮ туˮ кыптыˮ
«Тыˮ туˮ шихиԓедят» –понантоӈ чейня ӈаԓка нешаˮ таԓям манаӈаˮ. Тутыкуˮ ӈычимахатыˮ тэӈиˮ ӈуп дяханантоӈ нишʼтуˮ мыˮ. Нум кынсумахат, недяӈкуˮ хусамахат куптаӈ мят кӭвхана нишʼтуˮ вынюˮ. Чейня тыˮ туˮ капʼчоштуˮ.
Выӈкна диԓинаˮ куки нешаˮ тытоӈ ӈайтапташтутуӈ. Пуровскийʼ районхана тэсамыˮ нешаˮ ӈукаˮ. Каԓьтуӈ тытуӈ падиԓьчиˮ камна нешаˮ, нысмаˮ, капиˮ совхозхана мансԓаӈаˮ. Пюԓ дяхана шича таԓьша предприятии. Таԓкахай «Верхне-Пуровский» совхозʼхана хампԓяӈк бригадаˮ. Таньняна мансԓаннаˮ ӈопшеԓ шеӭв дёнаԓ ӈок тыˮ падиԓяˮ. Пытуӈ ӈупчики чейня тытуӈ ӈайтапташтутуӈ. Тэхэна мэнаˮ нешаӈиˮ чупей мансдямтоӈ хомана чедимяӈатуӈ. Таԓям пуˮ тахана ӈука тыˮ дёхоԓавтамыӈ тытуӈ ӈысыˮ пуӈʼчеӈяӈ тэвԓаштутуӈ.
Чуки похона таӈичохона ӈаԓкамана нишʼ дячапю, таԓям тыувдиˮ ӈыдихийтуӈ шеԓ нимайˮ тэтан. Чейня тутыкуˮ ӈычимахат, пинԓюдюˮ хэймахат тэӈиˮ таньше вимнянтуӈ дятэԓьш ӈамшитуӈ хомана мештуˮ. Мят тохомыˮ тыˮ куптамна дятыԓпатуӈ ӈотнаӈ мятуӈ няӈ ӈайта ӈотакомтоӈ ништутуӈ дёсˮ. Тыˮ падиԓтаˮ нешаˮ ӈатан, куптаӈ тытуӈ кӭйвунуˮ маныпатоӈ, чикиминхантуӈ ӈопʼнякуӈ мэштутуӈ. ԓ ӭ
Тыˮ падиԓма мансдян нешаӈиˮ тамна нючаӈэ тохоштуˮ. Таԓям куше тыˮ ԓэтпёма мансдям хомана чедимяӈатуӈ. Мыԓичуӈ, неԓьчеэй хыԓакохона тытуӈ ӈай ӈопт ӈомтапёнԓнайтуӈ. Таньдёԓьшкана тэӈиˮ хомана ӈадямштут. Совхозхана мансԓаннаˮ нум хыԓямахат кынԓаш чепьмантуӈ неԓьня тытуӈ тонԓапёш чепяштуˮ.
Андрей Пяк патмы
Таттама: Андрей Пяк таттамы
Авторы
Няръяна Нгэрм
Темы