Тыдо’ сенз’’ ӈэӈгу’’

Ӈавэдана ӈарка тецьда’’ пуд нарэй’’ иба’’ ялэна’’ то’’. Ты’’ лекар’’ яӈгана пэяд’’. Нара’ няна ӈокханда 150 ёнар’’ пир’’ тым’ поса’ хабцяӈгад яӈгабато’ тараӈгу. По’ ямбан’ 543 ёнарм’ лекарабтаӈгу’’.

Нердена манзаидо’ мале ты’’ саполана иры’ нюртей ялэ’’ пиркана пявыдонзь. Ямал’ ӈардавна ӈэсы’’мана ӈэдалёрӈа’’. Теда’ Ямальской, Тазовской район’ няна самляӈг ты’’ лекар’’ бригада’’ манзара’’. Тадри’ тамна сидндет бригада’ тер’’ Приуральской, Надымской, Пуровской район’’ ня’ ханда’’.

Сие ниць иры’ нюртей яляха’’на нарэй яӈганавамдо’ ёльцеӈгудо’. Ты’’ ниць ирыхына ӈэвадёда’’. Лекар’’ манзаямдо’ таӈга минревандо’ е’’эмня Салехард-Надым’ поӈгы машин’’ сехэры’ ниня мюселембада’’ иле мядодо’ ӈабтамбасеты’’. Таняд ты пэрти’’ мяк’’ ӈэдалёрӈа’’. Тарем’ ӈэсыхыт хахаярка мэ’’. Серодо’ мерарка тидхалембидо’.

«Тюку по’ нумда я’’авла тецись. Ӈадьбята нюртей манзаина’’ паӈом’ яноць пява’’. Мэта пардонва’’ сата тецьдахана ханиворӈа. Тев’ ёльцяӈгана ты’’ лекарана’’ ӈокханда сидя ю’’ ёнаркад вата тым’ мале яӈгавы’’», — тарця’’ вади округна’’ ты’’ лекар’’ серо ня’’амбада ӈэвахы ерв Владислав Мулявин мэ’’ӈась.

Фото: Анна Яптик / Няръяна Нгэрм

Саляӈгардахана Ты пэрти’’ яляхана Нядаӈгарад’ няна илена Окотэтто Евгенийм’ лахана ня’’ӈаваць.

— Мань Наре’ няна мюсерӈадм’. Тюку сырава’’ таӈга мэ’’ӈаваць, вэва нувода яӈгуць. Тына’’ хэвдо’ сава’’. Ӈахакуд мале ӈэрё’ някуна серони таслэйнась. Телефонувна ты’’ лекарава’’ Ильинов Роман Владимировичм’ хонрамбидамзь. Тованда нерцюна ватми сертаӈгудм’. Ийми, хасава нюхуюни’ няць мер’ ӈабтаӈгува’’. Ӈарка Ярудей’ няна мэӈгува’’. Сие ниць иры’ нердена ялэ’’ пиркана яӈганабцува’’, тедари’ сабе пунда яӈгу. Ӈобтикы тецьди’’ е’’эмня яноць яӈганаӈгува’’.

Ӈэсыхында тадри’ ты’’ лекарадо’ тованзь мэ:

Фото: Марина Яр / Няръяна Нгэрм

Лекар’’ поса’ хабцяӈгад лекарабтаӈговандо’ хавна хусувэй ӈэсы’ тэхэт вэидо’ ханаби’’. Манэ’’махадандо’ бруцеллёз танявам’ — яӈговам’ тасламбаӈгу’’. Хусувэй тым’ ненадумдамби’’, хавопярха RFI’’-биркадамда тебдемби’’. Ты’’ лекар’’ ёльце саву’’ядо’, няд’’маӈэ мэ’’эйдо’. Тикым’ няд’’мяць хусувэй ӈамгэм’ тасла пирта’’: ервамда, хурка хабцяӈгад прививканда танявам’, сян понда ӈэвам’.

Вы’ тер’’ тыдо’ ненадумда’’маӈэ тамна «чип» ӈабтамби’’. Тюку по’ ненэця’’ 150 ёнарм’ тарем’ ненадумдаӈгу’’. Танырця’ вэно исяламбавахад, ӈани палаӈгана хабцяӈгат ӈобтикы яӈгабидо’. Тикы’ е’’эмня есям’ ни’’ салдамбю’’.

Маӈгты’’ ирыхына ты’’ лекар’’ няби яӈорэй’ вынд’ тэворта’’. Та’ сертавандадо’ ӈани’ ӈока ӈэсеты.

Автор: Галина Окотэтто’ падвы

Авторы

Няръяна Нгэрм

04:00, 03 апреля 2026

Темы