Няръяна Ӈэрм
Тына’’ едясяӈгу’’
Тюку’’ тодо’’ яхат ма’’лавы юн’’, мал’’ ты’’ нямна ӈа’’. Ханяна яӈгана’’, хибя сяӈок тым’ пардонтавы, сямбират’ яӈганаӈгу’’ ӈобт’ ма’’лэйнаць. Таддикахад ты пэртя’’ едэй мутры ханзер’’ мэ’’мам’ ваде’’ӈава’’.
Тасу’ явхана тыдо’ поса’ хабцяӈгад маӈгты’’ иры’ нердена ялэ’’ пиркана яӈгаба пяйдонзь. Манзаямдо’ вэба’ иры’ ӈэсонд’ минреӈгудо’. Тасу’ яв’, Паюте’’э’, Ӈоя’, Ӈэдя’ выӈгана мэнаха’’ тэворта’’. Теда’ яханандо’ ю’’ ты’’ лекар’’ бригада’’ яӈгана’’. Тюку яля’ пиркана самляӈг ю’’ ёнар’’ тым’ пардонтавыць. Таняна сидя юр’’ ю’’ няхар’’ ёнар’’ тым’ яӈгабато’ серо’’ӈа. Тикыто’ ирмня бурцеллёз хабцям’ таславандо’ няю’ тэхэт вэям’ хан’’ла’’. Манзаямдо’ яна’’ тиӈгывна сяхаринда мирци’’ пэрцетыдо’.
Пэ’’ хою’’ няна ӈод’’ ты’’ лекар’’ ӈобтикы тэтна’’. Яханандо’ мат’’ ю’’ ӈоб’’ ёнар’’ тым’ яӈгаӈгу’’. Тюку по’ яноць пардонтаӈго пэйдаць. Округна’’ ты’’ лекар’’ ӈэвахана мэна ерв Евгений Попов’ вадавна, нямэхэна пон’ нарась, ӈадьбято’ пэ’’ тер’’ яноць яӈгана пэйдаць. Тецьдахана ты’’ лекар’’ манзара нидо’ пирас’’. Пыдо’ пардондо’ икня поёлтамбада’’, тикар тецьда нумгана салабаӈэ хэсь пир’’ӈада. Тарем’ ӈод’’ тыто’ ӈокаюм’ пелям’ мале пардонтавыдонзь. Сельбя’ ёльцянд’ 547 ёнар’’ тым’ яӈгаванзь тасламби’’.
Сямянхат ӈока тым’ — Ямальской районхана яӈгавы’’, пуданда — Тазовской район миӈа, няхаромдэй — Приуральской район. Ты’’ хавна малкось вэнеко ӈани’ пардонтамбидо’. Вэнеко’’ хаӈгулабто’ ты хабцяӈгана ӈани’ палабта пиртыдо’.
Яна’’ тиӈгывна ты пэртина’’ тарем’ иле’’. Ӈамгэ’ пиркана Ямална’’ ӈардавна сяӈок сую ӈадимам’ намдаӈгува’’. Тедари’ ӈатенава’’.
Автор: Марина Яр’ падвы
Авторы
Няръяна Нгэрм
Темы