Тырада мэбе”ӈа

Ӈарка яна’’ тиӈгэвна сита теневана ӈока. Юкад вата тет похонанда тикы серм’ тохоламба пявэда, сидндет по боксахана пирдырӈа. Дарья Салиндер — тыретана ненэй не, тырада мэбе. Ямална’’ ӈардавна ӈани тыретава манзаям’ пэртя ненэй не яӈгу.

Дарья Салиндер Надымской районхана Ныда хардахана соявы. Матдомдей классахана мэванда маляӈгана мята тер’’ ня’ Надым хардан’ тэвавыд’’, таняна иле таславэдо’. Школахана тохолкованда маляӈгана не няда боксахана сянакосетавы. Сяхаӈгав’ нянда ӈамгэм’ пэрмам’ манэ’’манзь таславы. Таняна тыретани маниеванда сер’, ӈобтарем’ боксм’ тохоламба пявэда. Нянанда нензел’’ то’’олха ӈэвы. Тамаляӈгана сиднетюмдей классахана тохолковы. Тад пуна таретавам’ тохоламба тидпой пявэда. Нерцюбт’ фигурной катанием’ харвабтавы, небяда гимнастикам’ пэрманзь миман харвавэда. Тарем’ нивы ерев’’, пода ӈокарка ӈэвы’’, сита падарт’ нивы пад’’.

Пыхыдм’ мэйрамбава

Тарця манзаям’ пэртяхана етри’ ныхыдо’ ӈокамдамба манзабтё тара. Пирдырмаха’’ хэванда нерня няхар’’ тренировкада ӈа, хамекованда ёльцяӈгана, ӈобтарем’ ида ни хасена’’. Имда хаселабтамба небяхананда телефонувна лахана, интернет’ мутра’ сер’ ӈавхы пирдыромида мание. Саць тоенаркана серм’ пяванда нерня Дарья’ вадавна хонёва серта яӈгу. Чемпионатан’ хамекованда ёльцяӈгана ида ни таӈг’’. Пирдырманда нерня сита теневана’’ Ямална’’ тер’’ интернет’ мутра’ сер’ сава вади ӈэдабтамби’’. Тарем’ паднана’’ ихинянда нули’’ сава’’. Маня’’ ненэй ненэцяӈэ сяхаринда нянда нятасетыва’’. Ямална’’ тиӈгэвна Дарьям’ маниена ӈока ӈэсеты.

Ненадумда’’мида

Ня’’мавы медаляда ӈока. Ӈули’’ саць тарана пирдырмахана ненэй ненадумда’’мам’ Россия’ Чемпионатхана ня’’мавысь. Тамна савомбовна боксахана тоходаванзь Уральской федеральной округан’ хан’’мы. Таняна едэй ӈавэ манэ’’мы, хамедавы. Тамна ӈани ехэрана ё’’ ня’ тэвормы. Тодо пареӈода я’’ тиӈгывна минрена турнирхана Сербияхана няхатата саць пирмэда. Тикы’ хавна ненэй медальм’ ня’’амвы. Ӈарка яна’’ пирдырти’’ министерство е’’эмнанда «мастер спорта» нюмам’ недво’’мы. Пыда ӈарка ненадо Кубокм’ ня’’мавы.

Дарья Салиндер ӈули’’ саць пэдава не. Тикы манзаямда пирӈада. Теневабцуда манэ’’лабтаванзь Ямална’’ школаха’’ тэворӈа. Сёбарӈэ тохолкода ӈацекэхэ’’ ханзер’’ тыреторць таравам’ ӈадимдембасеты. Небо’ Саляӈгардахана илебей ненэцие’’ мэлван’ турӈась. Иланда нямна лаханась, тэравы манзаямда ӈани’ ваде’’ӈадась. Нянда инзеленаха’’ сава тидхалёда вади мэ’’ӈась.

Тюку по’ вэба’ ирыхына Яр-Саляхана илебей ненэцие’’ форумхана мэсь. Саляӈгардахад товэӈэ мале ӈокаваць. Едэй серо тасламбиваць, тохолкуваць. Таняна пыхыдана’’ высылпа зарядкам’ сертабасетыва’’. Ӈоб хубта’ няна’’ Дарья тохолковам’ ӈадимдембись. Сита сер’ тыретормам’ тохоламбиваць. Тикы манзая, ехэрахаваб’’, ӈули’’ тоена. Пирдалева’ пир’’ ни ӈа’’.

Саць пэдава нява’’ тамна нерня’ ӈэя, варемда мэ’’ӈая. Пыда Ямална’’ пирамдёва ӈэ’’ нив’’. Ненэй ненэцяӈэ тэнзава’’ нерня’ пэрӈа.

Руфина Окотэтто’ падвы

Сидяӈг: Ю. Чудинова’ тадтавы

Авторы

Няръяна Нгэрм

08:00, 18 октября 2024

Темы