Няръяна Ӈэрм
Ӈудондана
Тикы нява’’ ненэй ненэцяӈэ поӈганана’’ саць ненадо. Пыда е’’эмняна’’ сертавэда толава’ техэ. Нюмда сяхари’ хэтаб’’, янда терари’’ нись ӈа’’ мал’ теневадо’. Носиндалава’ иры’ 26 яляхана — си’’ив ю’’ самляӈг поданда хая. Сергей Николаевич Харючи ӈарка соя’’ма’ яля.
Илаӈгананда ненэсянда хуркари’’ юнета’’ нюбе мэ’’ӈа. Ӈамгэри яхана сидта си’’ив я’ тер’’ тенева’’. Ханя, тэнзанда мюдм’ минрева — илаӈгана нензел’’ сер’’ вуни ӈа’’, тарем’ ӈод’’ ӈудондава нянанда саць тоенанараха ни ӈа’’. Ӈавнанда Сергей Николаевич Тасу’ яв’ няна вадёвы. Мята тер’’ ты пэртя’’ ӈэвыць.
Ӈарка недармамда ӈавнанда «Ямал-ню’’на’’я!» Ассоциацияхад пядась. Тикахана ӈока по’’ ӈудонданаӈэ тарась. Ӈамгэ’ пиркана тодо’’ яха’’на илена’’ ӈэрм’ тер’’ Ассоциациям’ ня’’мась. Тикамда ӈани’ пон’ минредась. Таняна ӈод’’ си’’ив’ я’ тер’’ сававна торомдэйдась. Ӈока по’’ ямбан’ Ямална’’ Законодательной Собранияхана нермбэртяӈэ тарась. Пыда’ мальӈгананда ӈадимдевы’’ яна’’ ненадумда’’ма’’, закон’’ тамна няд’’маӈэ мэ’’эйна’’.
Пыда тамна ӈарка ненадо учёнойва’’, «доктор» нюмам’ мэ’’ӈа. Тикы няю’ ӈод’’ ӈани’ пон’ тохолко серо’’ӈа. Сергей Николаевич си’’ив я’ тер’’ ӈарка политика’ серо минренаӈэ теневабто’ ӈод’’ маня’’ ненэй ненэцяӈэ нянана’’ — маня’’ хар’’на’’ нява’’. Ӈокаӈэ ненэй ненэця’ тэнзава’ минренава’’. Поӈганана’’ пирувнанда политика’ серо теневана яӈгу. Маси’’ хуна сяхаринда ирива’’ ненэй ненэцие’’ поӈгад ӈопой хибярим’ хоӈгу. Тикы ненэцянд’ нерня’ мэта хабтанда ӈэва’ иням’ мита.
Яндой пухуцянда ня’ няхар’’ нюм’ вадаӈаханзь. Теда’ мале нюди’ харто’ нюсавэй’’, харто’ иландо’ недам’ нёда’’. Сергей Николаевич минрена манзаянда ирмня ханевам’ харвобта, халядава нянанда саць сейхаданда паӈгадёда сер’’. Ӈодь’’ сохонда таняб’’, еся ханда вынд’ ӈэдалёсеты.
Автор: Марина Ярой
Авторы
Няръяна Нгэрм
Темы