Няръяна Ӈэрм
Ӈука нешаˮ таӆаӈашˮ
Ӈамыӆи нешиӈ нямта хома шоньшахана нямата таӆа. Таӆям маняˮ Пуровскийʼ районханана шанат тэмсˮ нешадиˮ дилм, культурамʼ ӈычимчимпёш куӆкаӆиˮ мероприятииˮ шеӆташтуˮ. Куше нешайˮ таӆамам маныдеман хаʼтаˮ «Прибрежный» паркан ӈомашˮ. Таньняна «Танцы сквозь века» нимита этно-вечеринкамʼ шеӆтаӈашˮ. Ӈука тэмсˮ нешаˮ таӆаӈашˮ.
Чики проектʼ шанат тэмсˮ нешадиˮ культураӈ дет тонӆюта центрхана мансӆанниˮ шеӆтамы. Манӆе шеˮвимты пуӈ мэсуматуӈ. Таӆанаˮ таньдет хомана ӈанатамэт. Мэчитуӈ паныдётуӈ, куше таӆаматуӈ таймана хомашˮ, шаӈкмян нешаӈ вин каамдяташˮ. Кусамэй нешаӈ тэмс каӆьта диӆисовта дилта, ниӆиныхитата, катаныхитата кадюмы. Куки тэмс нешаˮ хома дяӆяханатоӈ таӆаштуˮ. Таӆям таӆама шаӈкмян нешаӈ дилхана тадя.
Маняˮ Ӈэӆм дяхана диӆинаˮ нешаӈэˮ культураханана таӆама чуки ноптухут ӈычимы. Каӆтыхинаˮ, ӈамыӆиˮ праздникханаˮ таӆанаˮ тадямэштуˮ. Выӈкна диӆинаˮ нешаӈиˮ ӈай таньше нишʼтуш дядяпчуˮ. Выӈкай дилхана мансдя ӈука, куӆяпт куше таӆамам тохоӆампёш. Деты ӈычимчемпючетуӈ таӆамаˮ выӈкай дилм маныдеˮ шеӆтамыˮ ӈӭштуˮ. Дёӆиӆма, каньдяма, хайтуӆама, мэдятама, тынуӈтаӈкума, тыхуӆма — таӆьша мансдиˮ кэташ таӆаш мэчитуӈ постановкетоӈ шеӆташтутуӈˮ. Четы мэмытуӈ этно-вечеринкахана ӈупчики куӆкаӆиˮ таӆамаˮ тадяӈашˮ.
Чуки похона таньше шеӆтаӈатоньш: неӆьчеэй хыниӆтаˮ ӈамыӆи тэмс нешадиˮ куше таӆамам маныдеӈашˮ, тайˮня ӈокна чики манымайтуӈ кэташтутоньш. Таньше таӆаш тохотаӈашˮ. Маняˮ Пюӆ дяханана шанат тэмсˮ нешаˮ диӆеˮ. Ӈука таӆамам этно-вечеринкахана ӈычимчеӈашˮ, тохоӆаӈашˮ. Таӆям чики мероприятитоӈ дёӆьше вильӈаш. Каӆьта ватамананта мунума, кынума, таӆама — чуки дилхана культурамʼ чуув падеӆьш, ӆэтӆампё мэтаˮ таӆанаˮ шеӆˮ. Ненымана ӈаӆтанаˮ ӈашкэхенаˮ таӆа. Таӆям культурахана мансӆаннаˮ ненаˮ таньдет шанат мероприятииˮ шеӆташтуˮ. Шича часʼ дямпан этнодискотека миньдяш. Хыниӆмантуӈ мэт томыˮ ӈупчики таӆанашˮ нетуӈ маныдеш таӆаш чепяштуштушˮ.
Чики дяӆяхана таӆасодяш, хыниӆсодяш этнодискотекан томыˮ нешаˮ хома шоньшахана, майпёшь нетуӈ няш ныптакушˮ.
Лариса Айваседо патмы
Авторы
Няръяна Нгэрм
Темы