Няръяна Ӈэрм
Ӈука вачиˮ патӈаˮ
Няхамты пуӈ Пуровскийʼ районнан томатуӈ. Петаԓахана диԓинаˮ нешайˮ ватам тохоԓампюта экспедиция Таԓкахана, Каԓпюԓкана мансԓаӈа. Чики группа Москвахат томы. Лингвистʼ мансдяӈ дет тохоԓкотаˮ НИУ «Высшая школа экономики» и Московский государственныйʼ университетхат мэнаˮ ӈашкиˮ.
Куше мансԓамамтуӈ, куԓка ӈайватам мэмамтуӈ, шаӈок ӈамым манԓе шеԓтамамтуӈ — чики шеԓутоӈ Ӈэԓмʼ чеԓˮ дет тонԓюта управленихина вачадятоньш. Таньняӈ шичитоӈ Ӈэԓмʼ чеԓˮ дет тонԓюта Советʼхана мэнаˮ каптаӈашˮ. Ватам тохоԓампюма хома, таԓана шеԓ. Нешаӈ вата, ӈыди ватахаˮ манӭш, хомана тохоԓамы ниӈа. Петаԓахана диԓинаˮ нешаˮ каԓьтуӈ ватаманантуӈ ӈайта шанԓи патаԓтуӈ.
Пуровскийʼ районхана диԓина нешаˮ неԓьчеэй букварьтон 91-й похона ӈычимяш. Четаӈ нешаӈ ватамана пачутаˮ — ӈуп словарь, школахана мэтаˮ шанԓи электронныйʼ патаԓˮ. Ӈыди патаԓтуӈ дику. Ӈамыԓи нешаӈ тэмс каԓьта ватамта ӈопкат нипта мэс, писменностьта дякоп, меԓ ватамта дюԓнаӈата. Таԓям Москвахат томыˮ экспедиция нешадиˮ нятапита. Няхаԓ пуӈ дямпан ватам тохоԓампютаˮ лингвистˮ ӈука нешаӈкнаˮ мунуӈашˮ. Таԓкахана мансԓамантуӈ камна нешаӈ ватам тохоԓампютаˮ куки студентыˮ Каԓпюԓант кадяшˮ.
Москвахат томы ӈашкиˮ хомана ватамтуӈ чедимяна нешаӈкна мансԓаӈаˮ. Ӈуп дяԓяхана шанат вачиˮ паташтуˮ. Шаӈкмян ватаӈ каԓам ԓусаӈ ватамана ваштутуӈ, тайˮня нянатуӈ мунутаˮ нешаˮ каԓьтуӈ ватаманантуӈ кэташтутуӈ. Ӈука тапякуˮ, неша ватаӈ дет ӈайтаˮ, намташтуˮ. Таньше мунумамтоӈ хомана патмайтуӈ вачитуӈ тасԓамантуӈ мэтыˮ диктофонан пытыпитуӈ. Шичитуӈ нятапётаˮ нешаˮ таньше ӈашкӭхена мунуш ӈупчики дюԓмайтуӈ вачитуӈ вивхаԓьштуˮ.
Пыʼтоӈ маньштуˮ: «Маняˮ нешаӈэ каԓьна ватама чуув нипʼнанаˮ падеԓ, навэт нинаˮ нешаӈ ватам дюԓнаӈаˮ. Тайˮня ватама дюԓпанаˮ — ԓушиˮ понт тахаԓумтӈамаˮ». Ӈамыԓи нешаӈ тэмс каԓьта ватамта ӈопкат нипʼта мэс, тонԓако мэтата патаԓта дякоп, меԓ ватамта дюԓнаӈата. Четан пуˮ тахана ӈука нешайˮ ватаˮ димкумштуˮ. Чуки ноптухуна таԓям тэмстуӈ чадю нешадиˮ ватам ԓэтԓымпитуӈ. Москвахана тохоԓкотаˮ ӈашкиˮ манԓе аудиословарь, онлайн разговорникʼ шеԓтамайˮ.
Четаӈ школа-интернатхана нешаӈ ватамана урокуˮ минԓеˮ мансԓанниˮ няш деты патԓуˮ пытыпиˮ. Чикиˮ патаԓˮ няхаԓ классˮ дёԓьшат тохоԓкотаˮ нючаˮ ӈашкиˮ дет тонԓютыˮ. Таԓьша патԓотуӈ ӈычимахат, нешайˮ ӈашкиудиˮ каԓьтуӈ ватаманантуӈ тонԓакоштоныˮ. Чики мансдетоӈ НИУ «Высшая школа экономики» и Московского государственныйʼ университетхат мэнаˮ нешаӈ ватаӈ дет патмайтуӈ проектʼмана шеԓтапитуӈ. Чики неԓьня грантʼ дет ӈайта конкурсхана мянаԓьш нэхэԓяшˮ.
Таԓям чики хома проектʼ шеԓтапёшь ООО «РН-Пурнефтегаз» нятапётдята. Пуровскийʼ районхана нешаӈ ватам тохоԓампюта экспедиция чуки диԓиӈ дямпан мансԓаны. Патаԓшата вата неньшаԓмана тохоԓанана ниӈа. Таԓям шеԓтаваньчитуӈ ӈайвачетоӈ тамна ӈукаˮ.
Андрей Пяк патмы
Таттама: Андрей Пяк таттамы
Авторы
Няръяна Нгэрм
Темы