Няръяна Ӈэрм
Ӈулиˮ ваˮлёйˮ
Хэвы ныланаваʼ яляхана Харп хардахана «Северный характер. Трейл» миӈась. Сюрамбадаˮ помнандоʼ пирдырӈаць.
Округнаˮ тодоˮ хардахат товыˮ ӈокаць. Пыхыдадоʼ ӈахакуд интернетʼ серʼ падвыдонзь. Сюрамба пявандаˮ сехэрытоʼ хун мале сянась, ӈамгэʼ тоˮолхавна сюрамбававамдоʼ хусувэдоʼ харта таславэдась. Хубтахана — тет юˮ ӈэдалавамʼ пявандаˮ сюрбыдаць. Яляʼ ерʼ ёльцяӈгана сидя юˮ сидя ӈэдалаванʼ ӈобкана сюрамбадаˮ хаяць. Тад пуна юкад вата сидя ӈэдалаваʼ хунадмʼ пирдалевандаˮ нэкалӈадонзь. Тикы нита ирмня саць ямб сехэрымʼ пэртиˮ нюртейдоʼ тось. Сёяхаʼ тер Владимир Тусида мереˮмысь. Ханзерˮ техэ ямда сюртеванда нямна лаханась:
— Тоенанада яӈгусь. Таʼ ямбанʼ тюку пирдырманʼ хамекудамзь. Пяванда сехэрэни хурка ӈэвахад ехэрадамзь. Пэˮ, садаˮ помна сюрамбиваць. Яхаʼ и маторпиваць, сарёход ӈулиˮ панвыдаць. Пуняʼ ӈаниʼ ӈобтикы явнанаˮ товаць. Нюртейӈэ товандаӈэ пыхыдами нивась тосаˮ. Нянани миндяˮ ниниˮ поӈгана меретяˮ ӈокаць.
Ӈэрмʼ терˮ нехэт сидя юˮ сидянʼ сюрамбавэхэт Пэˮ хоёˮ няд ӈэда Нина Лаптэй нерня тось. Пуданда хабейˮ не Нелли Куртямова ӈадимясь. Хасавахат Юрий Лаптандер нердесь. Няхаромдэйӈэ Тасуʼ яʼ тер Эдуард Яр пирдалевэдась. Ӈобкана сюрамбавэхэт Тасуʼ яхад товыˮ нябимдейӈэ хаˮмыдаць. Нита ӈэвахана Антон Сэротэтто мэсь, вадида тарцяць:
— Хусувэй поʼ турцетываˮ. Ӈобкана, тодо яхана сюрамбасетываˮ. Тюку поʼ ӈобанзерʼ сюрамбиваць. Яхананаˮ етя хамекуваць. «Северный характер»ʼ пирдырмахана етриʼ мэсетываˮ. Тедаʼ нябимдей янʼ хаˮмываˮ, малʼ сававна мереˮмэваˮ.
Хусувэхэндоʼ медаль, есьˮ ӈэсяӈо миˮӈаць. Тикыʼ хавна командаʼ терˮ кубок няˮмарӈаць. Юкад вата сидя ӈэдалаванʼ мандалӈэ сюрамбавэхэт нерня Ямальской районʼ терˮ тоць. Нябимдейӈэ Тасуʼ яʼ терˮ тэвыдаць. Хартоʼ яхана мимэхэт ненадумдаˮми няˮамвыˮ: Кристина Сэрой, Ярослав Лаптандер Яр-Саляхад товэхэʼ, Анатолий Лаптандер — Пэˮ тер.
Ӈобанзерʼ сюрамбавэхэт Роман Яптик мась:
— Маняˮ юкад вата сидя ӈэдалавамʼ пирдалеваць. Мань таӈгунат сюрбероˮмами яӈгу. Сёяхахана тохолковани мальӈгана няхарˮ, самляӈгʼ ӈэсондʼ мэсетыдмʼ. Сянаковаʼ яляхана пирдырцетыдмʼ. Тандаяʼ Харпанʼ командахаданаˮ ӈопой нями сиˮми телефонувна хаӈась. Мань тыˮ мякана мэдамзь. Таддикахад яда харданʼ тэвываць. Ӈавэдана билетˮ танявыць. Тамини Саляӈгарданʼ тиртя ӈанохона тодамзь. Ехэрана харадмʼ манэˮӈадамʼ. Тюконʼ нидмʼ тэворцетуˮ. Ихиняни ёльце сава. Командаваˮ нита нерняʼ хаˮмыць. Тадриʼ вэбаʼ ирыхана манзаяʼ няюʼ тохолкодадмʼ. Надыманʼ падрони мийнась.
Ненэсянда пирӈадоʼ, ваˮлёйˮ, варемдоʼ мэˮӈаˮ. Ӈани яляхана ханяӈыдоʼ Уренгойхана пирдырмахана мэӈгуˮ.
Руфина Окотэттоʼ падвы
Авторы
Няръяна Нгэрм
Темы