Вадамдо’ нерня’ минре’’

Вэба’ иры’ пудана яляхана Санкт-Петербургхана ӈэрм’ терӈэ нядна’’ перена’’ юн’’ ӈадимяць. Мал’ ӈобт’ ма’’лахая нянда’’ тэвра таслэйнаць. Маня’’ тохолкодаӈэ нямнана’’ ӈа’’.

Ӈэрм’ тер’’ Иститутхана ненэй’ ненэця’’ ансамбльм’ ӈадимдець. «Едэй яля»ӈэ нюмдедонзь. Наӈэдя яля’ вэс ансамбльдо’ нюмд тасламбавыць. Ӈули’’ нюрте’’э’ мараӈгаӈэ, хаер’’ яляӈэ, хаеракоӈэ нюмдеван’ харвавэдонзь, пуна’ теда’ мэта нюмгнандо’ хасермыць. Хэтырта саваӈэ таславы’’.

Т. Сэротэтто’ тадтавы’’

Ансамбальм’ ӈадимдеванзь Ӈэрм’ тер’’ институтм’ ня’’амбада Софья Александровна Унру тяхакуна табековысь. Тохолкода ненэй ненэцяӈг’’ пыда ма’’мысь:

— Пыдара’’ ӈобкана ӈопой иӈукана минренара’’ яӈгу. Тарси’’ ӈобт’ тараванзь, тэри ядэрманзь ма’’люрӈаданё’’? Ненэй ненэцяӈэ, институтхана тара пир’’ӈаранё’’, харе’’ иланда саирм’ манэ’’лабтамбаӈгуда’’. Ӈани яхана илена’’ ненэця’’ сидта’’ сававна торомдаӈгу’’.

Тарця вади’’ пуд мале сянӈэ ансамбльдамдо’ ӈадимде’’. Нюртей таравамдо’ литературам’ манэ’’лабтамбава’ яляхана мэ’’ӈадонзь, тикамдо’ «Сеӈгакоця» сё’ ед’ сертадонзь. Тикы яля’ сидто’ манэ’’манзь мале сян ненэця’’ товыць. Тикы’ хавна Ямална’’ литература’ сайтм’ манэ’’лабтаць. Сайтханандо’ округна’’ тер’’ паднани’’ манзаи хось пиртада’’: луца’’, ненэй’ ненэцие’’, хаби’’, тасу хаби’’ вадавна, английскойхарт таня. Ӈани я’ тер’’ ӈобтарем’ Ямал’ книга ӈани’ толабидо’. Сянхав маня’’ паднанина’’ тикы вадан’ падвыдонзь. Хибя луца вадахад ненэй вадан’ падван’ харвабата, харта падвэнда таняб’’, сидта нядаӈгу’’.

Ӈэрм’ тер’’ Иститутхана тарем’ паднаван’ харвана’’ мале ӈадимяць.

Тохолкоди’’ яля

Хахаяда яля’ Ямалхадна’’ тохолкоди’’ яля ӈась. Тодо яхана тохолкода илебей ненэця’’ ту ӈанохона харад’’ помна ӈэдалёрӈаць. Тарця тарана сер’’ хусувэй по’ таня. Нидо’ ӈобт’ тэебтамба, савовна тохолавандо’, ӈарка харадм’ манэ’’мандо’ е’’эмня ма’’лёвы’’.

Тюку по’ квестхана сянакуць, мультик’ сер’ сертавэдо’. Хусувэй нулталвахана тохолкода’’ ӈамгэхэвм’ пэрӈаць: сэвто’ талё нито’ ӈуди ня’’амба матё ӈани ян’ тэва тарась, таросяр хурка ӈэвам’ падаркана падыбиць.

Ту ӈанохона няхар’’ юдмян’ вата ненэця’’ товыць. Нидо’ ӈули’’ нюрте’’э’ сабе ехэравыдонзь, ӈобкана ӈэдалёро’’махадандо’ нидо торомдэйдонзь — тикы’ е’’эмня тарця сер’’ тара. Ту ӈано’ нид ха’’ам’’махадандо’ хусувэндо’ ида ёльце савась. Мал’ ӈобкана ӈэдалёро’’мамдо’ ненадо ялэӈэ ваде’’ӈадонзь.

Татьяна Сэрой’ падвы

Авторы

Няръяна Нгэрм

09:40, 02 октября 2024

обновлено: 10:01, 02 октября 2024

Темы