обновлено: 08:51, 07 декабря 2025
Няръяна Ӈэрм
Вадаваˮ паˮмя харраха
Мале танякуй похона хареˮ вадавнандоʼ паднаниˮ едʼ саць тарана конкурс ӈадимясь. Невхы паднанаˮ иринатоʼ, ненэй ненэцяˮ — Л.В. Лапцуй, тасуʼ хабиˮ — С.И. Ириков, хабиˮ — П.Е. Салтыков нюбе мэˮӈа. Таняд сяниˮ поˮ ямбанʼ ӈока едэй паднанаˮ нямна намдорӈаваˮ.Тюку поˮ ӈодˮ ӈаниʼ конкурсадоʼ ӈась.
Тюку поʼ матˮ ненэй ненэцяʼ ӈэвысь. Малʼ округнаˮ терˮ. Хусувэдоʼ харта манзаямда яхананда минре. Падвыдоʼ ӈодˮ техэ яхатоʼ хаˮморӈаць. Конкурсанʼ падвыдоʼ ӈэдаравандоʼ няюʼ тикыдоʼ нюртеˮэʼ газетахана, интернетʼ мутрамʼ нядˮмяць ӈадимдембабатоʼ сероˮӈась. Тарця вато нюракупатоʼ сиддоʼ конкурсанʼ ӈэдарамбиˮ. Маняˮ ненэй ненэцяӈэ поӈгананаˮ ӈобтикы ваˮлёй паднанамдоʼ таславаць.
Харта ӈодˮ тарця ненэцяʼ конкурсахана мэбˮ, ӈани нидоʼ сэв ӈадя пуняʼ хаюрӈаˮ. Тикы нянаˮ ненэй вадавна паднавада — манзаянда саирˮ. Хусувэй яляʼ хареˮ вадахананда иле. Ӈыхы сэванда сылоˮмахад вадаримда мэˮӈа. Тюку яляʼ пиркана сита пирувна ненэй вадавна падна пирта яӈгодаʼ тоˮолха. Тиканда хавна тамна ненэй ваданда грамматикамʼ техэ паӈгханда теневада. Тикар мянувнанда ӈаниʼ тоенана серˮ. Тюку поʼ ненэй ненэцяӈэ поӈгаданаˮ Анна Владимировна Яптикʼ нерня хаˮмыць. Пыда маняˮ газетахананаˮ паднана не. Манзаямда мале няхаромдэй поʼ минреда. Хусувэй падыбада вадада паркыбада мадавыʼ тотревʼ яханда хаˮморӈа, ӈобкарт ӈэвакамда ни ёˮпюˮ. Тедариʼ яхананаˮ тарця паднана ненэцяʼ танянахаванʼ ненэй вадаваˮ тамна понʼ яʼ сярʼ ниня таняӈгу. Конкурсхана ваˮлёй ӈэвамда намдˮмахаданда Анна Владимировна таремʼ мась:
— Ненэй вадаваˮ сямянхат хайнанаˮ вада. Ӈока ненэциеˮ поӈгана лаханако нянд танябˮ, сит теда пирта, нядаӈгу. Тедаʼ хэбидя сайнормахана хареˮ вададоʼ сидтоʼ нядаби. Ихинани таремʼ нерняʼ хаˮамвами ӈулиˮ поиˮ. Тикахана тамна вареми мэˮпани тара. Падыбада ненэй вадаваˮ тамна понʼ яхаʼ ендадаревʼ хайная.
Тикы конкурсамдоʼ 2012 поход минредоʼ. Падвыдоʼ вадамʼ мэˮма, мядʼ терˮ, общинаʼ манзаяʼ, янаˮ нямна ӈэбатоʼ сероˮӈаˮ. Нерняʼ хаˮамвы ненэцяˮ самляӈг юˮ ёнарˮ есямʼ няˮмарпиˮ. Нюбедоʼ тэнзатоʼ поӈгана пилиˮ теневыдоʼ. Хабиˮ, тасуʼ хабиˮ нинаˮ поӈгана ӈаниʼ нерня хаˮамвы таняць. Пыдоʼ ӈобтикы хареˮ вадидоʼ нерняʼ ӈадимдембидоʼ.
Автор: Марина Ярʼ падвы
Сидяӈг: Анна Яптикʼ тавы
