обновлено: 14:13, 12 сентября 2025
Няръяна Ӈэрм
Вадинаˮ мэканаˮ, нерняʼ минрехэнаˮ
Луциˮ яляʼ падаркана ӈаниʼ ӈобˮ нянанаˮ тарана хэбидя яля ӈадимя. Ӈарка Россияхананаˮ хуркариˮ тэнзˮ ненэцяˮ илеˮ. Хусувэдоʼ харта иланда саирˮ, мэсыта, вадида таняˮ. Тикынаˮ лэтраванаˮ еˮэмня маняˮ вареваˮ мэˮӈаваˮ. Ӈадьбята тюку поʼ ӈарка яхананаˮ тарця ненадо ялямʼ ӈадимдець.
Вэбаʼ ирыʼ сидндетимдей яляхана яхананаˮ хареˮ вадинаˮ ялямʼ ядабтамбиваць. Ӈарка янаˮ ервʼ ватовна сертавы. Нерцюбтʼ, тодоˮ тэнзˮ ненэциеˮ поё сава ӈэваʼ няюʼ манзарана Советхана мэнаˮ тарця иӈутʼ хаˮамвыдˮ. Ӈамгэʼ еˮэмня тикы ялямʼ тэравыˮ? Ӈавнанда Расул Гамзатовʼ сояˮмаʼ яля ӈэвы. Тикы няваˮ паднана ненэцьʼ, «аварец» тэнзмʼ мэˮмы. Хареˮ яхананда саць юнета хибяри ӈэвы: паднана, вадамда нерняʼ минрена, ӈани вадахаˮ падвыда тэволана. Тарця вырэй ненэцяʼ еˮэмня тарця ненадо ялямʼ мэць таславыˮ.
Тикы яля ханярина вадинаˮ мэˮманаˮ, нерняʼ минревана еˮэмня сертавы. Ӈарка янаˮ ӈардавна Россияхананаˮ сидя юрˮ ненэцяʼ тэнзˮ таняˮ. Тикыт сидя юрˮ сиˮив юˮ вадидоʼ, вадитоʼ хэтырˮ таняˮ. Хусувэйдоʼ яʼ сярʼ ниня ваданда таняваʼ няюʼ варемда мэˮӈа. Едэй хэбидя яля невхы вадинаˮ нивана ёˮманаˮ еˮэмня, нерняʼ минреванаˮ, паднаванаˮ, лаханаванаˮ няюʼ тидхалы.
Маняˮ ненэй ненэцяӈэ, ӈани ӈэрмʼ терˮ поӈгад вадаваˮ мэˮӈаваˮ, лэтрамбиваˮ. Хареˮ помнанаˮ лаханакурӈаваˮ, вадавнанаˮ ӈадиберта газетынаˮ таняˮ, школахаˮна ӈацекынаˮ вадамдоʼ тохоламбидоʼ. Маняˮ редакцияхананаˮ манзаранаӈэ хусувэй яляʼ ненэй вадаваˮ ядхананаˮ ӈа. Илеваʼ ямбанʼ невхы иринанаˮ, нерданаˮ паднавыˮ нинаˮ недамʼ нёдаваˮ. Тедалахана тикы сехэрэдоʼ тэри хайна, тамна пуднаˮ хаёвандаˮ ӈаниʼ таремʼ мимбатоʼ сава ӈэӈгусь. Округхананаˮ ӈодˮ вади нерняʼ минреваʼ еˮэмня хуркари тарана серо ӈадимдембиˮ. Тикы нядˮмяць хареˮ вадахатоʼ енанаˮ ӈокворӈаˮ.
Ихинани ӈамгэриʼ тоˮолха нядˮми ӈадимдембабатоʼ ӈодˮ, хусувэй хибяри небянда- нисянда вада таравамʼ, нивамʼ, мэˮмамʼ харта хамедамбида. Невхы иринанаˮ илаʼ саирмʼ, тэхэˮна мэвамʼ, халядаваʼ сермʼ нёданаˮ таняванʼ тамна ӈамгэʼ пират вадинаˮ мэць пиртынаˮ.
Марина Ярʼ падвы
Сидяӈгˮ: Марина Ярʼ тадтавыˮ
