Няръяна Ӈэрм
Ва’’лёй ныхыдырта’’
Лимбя’ иры’ 15-16 яляхана Ямальской районхы Яр-Сале хардахана Арктикам’ нюбета мякна’’ тёр’’ я’’авлыць. Таняна тодо’’ маркат, округна’’ тиӈгы районхат товы’’ ныхыдарта’’ Ямална’’ Чемпионатм’ мэ’’ӈаць.
Хасава’’, не’’ ханяӈэндо’ ныхыдырць мэбе’’мам’ хорпиць. Хусувэдо’ харта саӈгомгананда пирдырӈась. Ӈокханда юркад вата сёбар’’ ненэця’’ сянакованзь товыць. Сидя яля’ ямбан’ ныхыдырманда’’ ӈарка лохо’ мюня тёрдо’ я’’авлыць. Сырманзь товы’’ пирдырманда’’ нидо’ я’’авла масабтамбидонзь.
Тарця пирдырмам’ округханана’’ хахаяда похо’’на ӈадимдедонзь. Сёяха’ тер’’ ту хабтабади’’ ерв — Николай Иванович Окотэтто манзара нята нита ня яля’ ня’ ӈэда иӈуд няндо’ ха’’амвыць. Мале сян по’’ хэ’’мяхад ныхыдарма округханана’’ юнета сёбар’’ сянакубцаӈэ хая. Ямална’’ тиӈгывна тикы сянакубцхана мале юнета ӈадимя’’. Поӈганандо’ не’’ ӈани’ таня’’. Ярсаляхана нерня’ ха’’амвы ненэцие лаханакурць няйнась. Индо’ ядэрабцо тарем’ ваде’’ядонзь.
Константин Вануйто нюртей ян’ ха’’амвы, пыда 90-105 кг саӈгом’ мэта’’ поӈгана ныхыдырӈась.
— Мань Ямальский район’ Яр-Саля’ хой’ няд тодамзь. Хамеко’’мами сабе яӈгу, ныхыдырць ня’’мэхэбини’’ мал’’ мэбе’’ӈаць. Хусувэхэдандо’ ныхыдарця’ пям’ марӈавась. Теда’ харта тарем’ еремя — нюртей ян’ ӈани’ ха’’мыв’’. Ӈоб’ тарця сянаковахана пыхыдами хорпасетыв. Сянакова яляхана нерня’ ха’’морцетыдм’.
Нехэт 70 кг саӈгом’ мэтахат нябимдей ям’ ханавы не’ нюмда Лидия Яр. Пыда Си’’ив Харв маркад товы.
— Нердена по’ тарця Чемпионатхана пыхыдами хорӈав. Теда’ ихинани тэри сава, нябимдей ян’ ха’’мыв. Тад нерня’ ӈоб вареми мэтадм’, ныхыдами ма’’ламбаӈгудм’, тамна нерня’ ӈадиман’ харвадм’.
Мэнако Окотэтто няби Дмитрий Окотэтто Сёяха’ выӈгад товэхэ’. Мэнако харта саӈгомгананда нида мал’ нэкалъядась. Ӈадьбята нюртей ян’ ха’’мыць. Дмитрий няхаромдэй ян’ ха’’амвы’’. Пыда тарем’ мась:
— Мани’ тарця чемпионатм’ намда хой’ няд тонинзь, тамини’ Сёяха хардахад Ярсалян’ билет тэмдани’. Тюкона мэвами ихиня ӈули’’ сава.
Тасу я’ тер’’ ӈыхы яхана илебато’ ӈод’’, тикы сер’’ сидто’ нивысь табла’’, сянакованзь няби я’ вэкад товы’’. Ӈопойдо’ — Кирилл Няч, 65 кг саӈгомда мэта’’ нита поӈгана мэбе’’мысь.
— Мань нюртей сянакудм’, ӈанихина тарем’ ныхыдоро’’мами яӈгу. Чемпионат’ нямна интернетм’ няд’’мяць намдадамзь. Тадтикахад ненэцяндава’’ ма’’лаваць. Ӈобкана тось таславаць. Тюку сидя яля ӈули’’ сававна хаяха’. Мань яни терхат нерня’ ха’’амвы ӈока. Сёнзями ёльце маямби, теда’ манэць ӈыхы ян’ тэри нивэва’’ ту’’.
Сидя яля’ ямбан’ саць мэбэтидо’ таслэйдо’. Нерня’ ха’’амвы’’ ненэцяӈг’’ ӈудито’ терӈэ кубок, медаль, есь мипиць. Таняна нерня’ ха’’амвы’’ сёбар’’ Россияна’’ тиӈгывна ӈэванда Чемпионатан’ ханда’’. Мэбета’’ нито’ поӈгана тамна ва’’лёй ӈэвамдо’ манэ’’лабтамбаӈгу’’.
Автор: Мария Окотэтто’ падвы
Авторы
Няръяна Нгэрм
Темы