обновлено: 10:40, 22 октября 2024
Няръяна Ӈэрм
Ватаӈголыдˮ
Ӈэрёʼ сыранда хаˮамˮмахад, салабанда ӈамгэʼ пирувна няӈуроˮмахад ватаӈгодаˮ ӈадимзетыˮ. Пыдоʼ нянзико салабавна хусувэй яля поӈгарць варемдоʼ мэтаˮ. Тедаʼ ӈодˮ мале ӈэрмʼ яʼ няна ӈаябадʼ халянʼ харванаˮ яӈгабциедоʼ ӈахана нэкалъядонзь.
Тюку няхаюниʼ Тасу Явʼ явʼ няӈы Ӈэдя харадʼ тяхана нядэˮӈахаʼ. Яханандоʼ мале хорˮ ирыʼ нердена яляʼ пиркана сава ханьˮ тоць. Тамна ӈобˮ сиˮив яля хэˮмяхад мале салабаʼ ниʼ хаˮамъяханзь.
Вэсакоюмʼ Иван Марюйʼ ханевамдиʼ таремʼ вадеˮӈадась:
— Пухуцяни няʼ ӈодь ялянда сэв тюˮуна хэˮмяхад юркорӈаниʼ. Тедахав мале тохораханиʼ, поӈганиʼ манэˮмадавэйˮ ӈэбатоʼ — ялярˮ хумбанзиˮ хэняраха ӈэӈгу. Пухуцями ханяӈэхэна таминда салабаʼ ниняʼ мюлебида. Тарця халя ӈавыта яӈга, ёльце ӈавыдоˮӈа. Тедаʼ ватавыниʼ — сывʼ ямбанʼ нядˮмаӈэ тараӈгуˮ. Халяʼ хоба, лы тэри ниниʼ хаебюˮ, тикыд ты пэртиниʼ тоˮмахад вэнекунаˮ ӈаварˮ ӈэӈгуˮ. Харта ӈодˮ ненэцяӈгана ханеваʼ ёльцяӈгана хаюртадоʼ яӈгосеты. Хусувэй ӈамгэˮ хартоʼ таробцодоʼ таняˮ. Нюртеˮэʼ салабаʼ ниʼ хаˮамваниʼ мальӈгана тосакабтысь, тамальӈгана лаӈганда някуна пядыбининзь. Тедахав мале тохоламиʼ, салабада ӈодˮ няӈорӈа.
Лаханакурманаˮ мальӈгана няхаюнаˮ мале ватаӈговэхэнзь. Пухуцяюмʼ мятʼ тэвравы халэда еданда терӈэ мюлебись. Елена маˮнисяв: «Сеняʼ нюртеˮэʼ ватаӈго хэваниʼ мальӈгана хэвхананиʼ нердена нохоˮ ӈадимяць. Пыдоʼ хубтахана турпнаниʼ теневанадаревʼ сидниʼ ӈатесетыˮ. Салабаʼ ниня халямʼ мюлебабˮни етриʼ тосадмʼ, ӈамгэхэванʼ лаволабˮнанд тикыд мале сертавы халямд талевэдоʼ ӈэӈгудоʼ. Хусувэй яляʼ нидоʼ хонрамбададревʼ хэвхананиʼ нохоˮ ӈокворӈаˮ. Пыдоʼ ӈодˮ ӈобтикы тандаяʼ ватавы халянʼ харванакыˮ».
Марина Яройʼ падвы
Сидяӈгˮ: М. Яройʼ тадтавыˮ
