Няръяна Ӈэрм
Вэно вадаби
Вэбаʼ ирыʼ 15 яляхана Аксарка хардахана ненадо ялясь. Таняна Владимир Хавлович Лаптандер «Талота» нюбета общинаʼ председатель тэхэʼʼна мэтаʼʼ вэнекоʼʼ центрмʼ нэсь. Пыда ненэй вэнеко вадабаӈгу, пуна ты пэртахаʼʼ мипаӈгуда.
Няхатата ӈаркандоʼ нюмʼ — Пуро. Мале юʼʼ поʼ ямбанʼ танырцяӈэ тара. Тарта ёря, ӈэда мереʼʼӈаʼʼ, хавода саваʼʼ. Ты манзаямʼ теневада, ерванда мундʼ намдорӈа. Илеванда серʼ ӈобкартʼ суюмʼ сяклаʼʼмада яӈгу. Тедаʼ нылана, едэйвана еʼʼэмняндоʼ сертавы хардамда лэтамби.
Владимир Хавловичʼ мядʼ терʼʼ няхарʼʼ тарʼʼ нямдъяна нюдяко вэнекоцямʼ вадабиʼʼ. Нюбедоʼ малʼʼ ӈобʼʼ толасʼʼ буквахат ӈаʼʼ: Белка, Барби, Бим. Ервадоʼ маʼʼнисямʼʼ, таремʼ ӈамгэ похона сояʼʼмамдоʼ сававна теневаʼʼ.
Выӈгана малкодамʼ нядабада ӈобʼʼ тара пэрӈа. Хойʼ няӈы илаӈгана вэнекосипойʼʼ мэсь яʼʼмыʼʼ. Малкода яланда падена, варанда ты маʼʼла нида пиратʼʼ. Ӈадьбята танырцяʼʼ мюсертаʼʼ ненэцяӈгаʼʼна ӈулиʼʼ ӈарка нядʼʼмаӈэ, сава няӈэ толыʼʼ.
Приуральской районʼ тер ненэй мякана соявы. Тедаʼ нида Байдарата яхаʼ хэвувна мюсерӈаʼʼ, харта тыда ӈаниʼ таняна мэʼʼ. Владимир Хавлович таремʼ лаханась: «Общинами 2009 похона ӈадимясь. Тэхэʼʼна мэнаӈэ нянанаʼʼ танырцяʼʼ тарасетыʼʼ. Ӈопой ненэцяӈгана няхарʼʼ вэнеко ӈулиʼʼ мась. Вэноʼʼ небя похона 3-4 нюмʼ хось пирʼʼӈа, тикэхэд ӈокаʼʼ ӈэбтоʼ тэри таросяӈгуʼʼ. Ӈодьʼʼ няхарʼʼ ирыданда ханда миць сероʼʼӈа. Пуна несэй ерванʼ тохо яʼʼмаӈгу, пуняʼ нюртей ерваханда тута».
Мядондиʼʼ поӈгана округнаʼʼ ӈарка тыʼʼ лекар Евгений Попов, «Союз оленеводов Ямала»ʼ председатель Тимофей Лаптандер, «Выʼ сей» терʼʼ, юне тэволанаʼʼ, тамна ӈаниʼʼ ненэцяʼʼ мэць. Тимофей Нгэковичʼ вадавна тарця проект минрена нядаба тараʼʼ. Тикахана ты пэрмаʼ серʼʼ нерняри минда. Маняʼʼ яхананаʼʼ тынаʼʼ тамна вадёданаӈгуʼʼ, яваʼʼ похоʼʼ сямянхат тэсавэй яӈэ толёда. Вэнеко вэва нумгана малку, пэвдяхана е, мядмʼ пилкабтёда сармикахат лэтамби. Няданаʼʼ хахая иленаʼʼ нинаʼʼ ӈобтаремʼ Ямалхана нэвы тоʼʼолхаʼʼ центрдоʼ ӈадимзь пирʼʼӈаʼʼ.
Анна Яптикʼ падвы
Авторы
Няръяна Нгэрм
Темы