Няръяна Ӈэрм
Вы’ терха’’ таром’ ха’’аврамби
Выӈгана я’ еркана ӈэда’’ фактория’’ саць тарасеты’’. Лакри’ ӈаврар, бензинар сусаӈгу, ӈаха’’ вунин ӈэдалёд’’, хахаяда лабкан’ хандан. Тиртя ӈано таралпата ӈани’ таня’ ӈэдалаӈгун.
Ямальской районхана фактория мале ӈока. Панаевскхад сямянхат хахая ӈэда — «Хадыта», тамна’ тяхакуна Танлава яха’ вархана «Салпада» ӈа. Тикэхэ’ хавна «Лидино» таня, Ёркута яха’ тяхана еся сехэры’ ядхана ӈа. Ӈавна ӈули’’ ненадо’’ яха’’ сертавыдонзь, ты пэрти’’ мюселава’’ ё’’ тикавна хан’’ӈа’’. Лабкам’ ня’’амбадидо’ ненэй ненэця’’.
Салпадам’ ня’’амбадаӈэ Юрий Лявович Хороля тара. Пыда харта инда сер’ манзарана. Лабкамда 2016 по’ пиркана нэдась. Тамальӈгы поход ты пэрти нядаба пясь. Хусувэй ӈамгэм’ няндо’ мирдапасеты: ӈавар’’, бензин, буран’ сулоро’’ма’’, хуркари’’ хой’ няна мэта’’ ӈамгэри’’. Тэмдорти’’ турма’ хавна харта мядо’’мана ӈэдалёрцеты. Мюсена’’ ӈаврато’ сусава’ сер’ харто’ сита ханзеты’’.
Тандая’ манзаямда сававна минреванда е’’эмня, невхы ила’ саирм’ нерня’ пэрманда е’’эмня Юрий Лявович округна’’ ӈэвахана мэнахад ненадо падарм’ ня’’мась. Пыда тарем’ мась «Тэхэ’’на мэна’’ нини ӈоб’’ нядабасетын. Выӈгана хуркари’’ сер’’ танясеты’’, по’ ямбан’ маянд’ ереберта’’ ӈока’’ ӈэсеты’’».
Ненэся мюсерта’’ иде’’ хантанва’ мальӈгана тэтнасеты’’. Ханяӈэхэ’’на нара’ няна хибяхавм’ яха’ тяхад вэра тараӈгува, ӈанир ит’ пакалмы, буранада таркавы’’ ӈэӈгу’’ма. Тикы’ хавна буран’’ тахаӈгаӈгу’’ма, ёхоборта’’ таняӈгу’’ма. Тарця серт’ еремдам’ сяхари’ нядасетыда, пирдале я’’амнада яӈгосеты, ӈопой’’ трэколамда манзабтаӈгуда — я’ ханяри’ тэваӈгу. Ӈанихи’’на паромбари’ вадам’ хардан’ ӈэдара тараӈгу — ӈани’ пуня’ ни ӈэӈгу’’, лекар’’ ӈаном’ хамбата вадада минта.
Сяхаӈгав’ Юрий Лявович Тюмень’ няна тохолковы. Пуна мале ӈока’’ по’’ зоотехникӈэ таравы. Манзара мале’’мяхаданда таминда факторияхана иле таславэда. Теда’ харад’ хэвняна илевада нянанда ёльце сава, тарем’ янда терха’’ таром’ ха’’аврамби.
А.Яптик’ падвы
Авторы
Няръяна Нгэрм
Темы