Няръяна Ӈэрм
Выӈгы иле’’мямди’ тенеди’
Луца падаркана хор’’ иры’ нюртей яля — ӈаромбой ненэцие’’ яляӈэ таславы. Тикы’ е’’эмня иринахана, хаданахана сава вади мэцетыва’’. Пыдо’ илаӈганандо’ манэ’’мэдо’ ӈока, ваде’’мандидо’ ӈобтарем’ танясеты’’. Тандаярка ядэрмани’ сер’ сидя ненэцяӈг’’ торомдадамзь. Теда’ Саляӈгардахана иле’’ӈаха’. Сергей Лелеевич Окотэтто пухуцянда ня’ иле’’мямди’ ваде’’ӈаханзь.
Пыди’ илеванди’ ямбан’, мат’’ ю’’ поти’ ӈэсонд’ Сё-Яха’ выӈгана илевэхэ’. Не нюхуюти’ харти’ илам’ пяванди’ сер’, Саляӈгардан’ тось таславэди’.
Вэсако манзаядамда ховысь, пухуцяюм’ ненэй сэдораванда е’’эйӈэ панорӈа. Паӈгалмы ӈаворида ӈока: имбытад’’, саваця’’, ӈоба’’, насок’’, тамна ӈани паской ӈавори сертаби.
Лаханако ня’’ӈахаюнась, иланди’ нямна хонрамбихиюнась, тэхэ’’на иле’’миди’ тензебтембихинзь, хардахана хурка ӈэвам’ хэтӈаханзь. Вынд’ харвабцонди’ танявам’, яӈговам’ хонрамбидамзь. Пухуцяюм’ — Наталья Нябиревна тарем’ мась:
— Хардахана илева сава. Хусувэй ӈамгэ’ мэлва’’ хахаи’’. Вынд’ харвобцоми’ ӈоб’ юӈгу. Не нюхуюни’ няку’ тось тасламинзь. Нюни’’ ню вадаба нядаӈгуни’. Тябихутвахад ехэрадм’, мэвандами яля’ сер’ ӈока ӈэсеты. Пони’ ӈод’’ ӈокама’’ма’’, сидяриӈэ ты’’ мякана иле’’бани нянани’ тоенаркаӈгусь. Тикы’ сер’ тарем’ тасламинзь. Тохолковэни’ ӈэни’’ним’, серо хаця хамедамбини’’ма. Ядембада ё’’ нямна ядэрцяни’’ма. Тарем’ ӈарка харад хурка ӈэвахад теневани’.
Сё-Яха’ выӈгана иле’’мямди’ вэсакоюм’ Сергей Лелеевич тарем’ ваде’’ӈадась:
— Выӈгана илевани маляӈгана хуркари’’ я’’амна мюсерцетыни’. Хар’’ни мэлава’ ёни’ ӈобтарем’ таняць. Невхы похо’’на ямгад нявотана Ёнэй яхан’, сыра’ ханони’ мэлван’ тэворцетыва’’. Таӈгвахана мале сян ӈысыӈэ ӈобт’ ӈысурцетыва’’. Ӈэрё’ няна тэраӈгосетыва’’ма’’. Вэба’ ирыхана ненэця’’ таӈгамсетыд’’. Ты’’ падде ӈэвадасетыд’’, ты пэртя’’ харто’ сырэй мэлвахато’ мюселцетыд’’. Тад пуна ненэця’’ ёрманзь хамекода’’. Сэротаванда, сямдараванда халядамдо’ ня’’марпаӈгу’’. Хор’’ ирыхына нылёй’’ тына’’ сава мирбяхато’ ха’’морцеты’’. Тора сыра’ нимня ӈэдалёва сава ӈэсеты, я’’ мал’ ӈадясеты’’. Нумда ни тецясету’’. Тэхэна илевани нерня тамна илебей ненэцяӈэ ӈэвани мальӈгана тохолкудамзь. Ю’’ классам’ мале’’махадани’ Си’’ив харв харад’ училищахана тохолкудамзь. Пуна армиян’ си’’ми ханаць. Службани’ мале’’махадани Сё-Яхана манзарадамзь. Харад сертабадаӈэ тарадамзь. Тад пуна нисями нядаванзь хой’ ня’ танэяваць. Ты пэртяӈэ таралъяваць. Теда’ ӈани’ харад’ иланд’ тэвыни’. Тябихутвада юӈгу нив’’. Манзаям’ пэрӈадм’. Ӈаромбой ненэць’ ӈэхэваб’’, мань нянани харад’ ил’ сава. Лекар’’ мяд’, падарка’’на тарана серо’’ мэлва’’ хахая ӈа’’. Нюхуюни’ хэвхана таӈга пухуцяни ня илени’. Нюни’ нюкця манзаяӈани’, таӈар ненэцяӈэ хэ’’мяхавад ӈамгэхэрт ни тара’’. Ӈодь мят’ тер’’ хэвхананд мэя’’.
Тены похо’’на хой’ няна илена’’ ненэця’’ хардан’ илелаӈга’’. Ханяӈыдо’ сыра’ манзара’’, ӈани’’ та’ выӈгана тэхэнато’ мэсеты’’. Неры Сергей Лелеевич’ вадавна ӈармы ненэцяӈэ хэ’’мяхад ӈод’’ мят’ тер’’ хэвхананд мэя’’. Тарем’ лаханакуртахани’ лаханако няхаюни’ паромаханзь не нюнди’ хасава ню иримда пин’ хаӈадась. Пыда тэхэта паромбададарев’ минханда мун’ мян ӈацекэдрев’ ембаяць.
Руфина Окотэтто’ падвы
Авторы
Няръяна Нгэрм
Темы