Няръяна Ӈэрм
Выставка миӈа
Москвахана нюдя пэвдей ирыʼ тетимдей яляхана ненадо сермʼ пяць. Тамальӈгана «День народного единства»ʼ хэбидя ялямʼ ядабтамбиваць. ВДНХʼ няна ӈарка «Россия» нюбета Международной выставка форум манзаралъяць.
Таняна Россиянаˮ тиӈгы ё манэˮлабтамбиць. Ямалваˮ 75 павильонхана хоӈгураˮ. Нердена яляхана округнаˮ ерв Дмитрий Артюхов ӈаниʼ таняна мэсь. Пыда сита ненэцяˮ ӈока хибяриˮ поӈгат сидяӈгадамдоʼ сертаванзь ӈатедонзь.
Мядондахаˮ хуркариˮ ледокол, ту ӈано, сэрˮ варк, ӈэрмʼ терˮ иламʼ манэˮлабтамбиˮ. Интернетмʼ нядˮмяць хибяриˮ маняˮ явнанаˮ ӈэдалёрць пиртадоʼ. Округнаˮ иламʼ торомдаӈгуˮ. Ӈацекыˮ хуркариˮ мэкад кроссворд хось пиртаˮ, тикытоʼ няюʼ ӈудаʼ тер няˮмарпаӈгуˮ. Ӈобˮ яляʼ ӈэрмʼ терˮ ӈавар хорпаӈгуˮ. Нюдя пэвдей ирыʼ 23 яляхана Александрʼ няби Илонаʼ тюӈгутавадиʼ ӈэӈгу.
Ӈобˮ таняʼ ядэрмы Саване Ваной таремʼ мась:
— Ямални нямна ӈэда высткавкамʼ ӈока поӈгат тумдавась. Сейми хэтнарахадась. Санкт-Петербургхад тохолко нята ниниˮ няʼ товаць. Мань няндоʼ ями манэˮлабтамбидамзь. Ненэйвана ӈэрмʼ терӈэ илнаˮ нямна ӈока ӈамгэˮ таняˮ. Ненэцяˮ ӈулиˮ сававна манэˮсаръядоʼ.
Явлада Худи Новой Портʼ няд товы, манзаита ирмня таняʼ тэввыць:
- Тюку выставка танявахад ӈахана теневадамзь. Тедаʼ хареˮ манзаявнаниʼ Москванʼ еремядмʼ. Тарця сермʼ ӈабцата нивась ӈэдараӈгуˮ, ӈадьбяни хубтахана тодамзь. Маняˮ яваˮ ӈока нита поӈгат ненадо ӈэвы. Хареˮ ямиʼ манэць пирмдыдмʼ. Ехэрана ненэцяӈгана манэˮманда ӈока. Ӈаˮи яхана хареˮ сояˮмаʼ я сейхана саць пои.
Тарця выставка Россиянаˮ президентʼ, Владимир Путинʼ ватовна ӈадимдевы. Сие ниць ирыʼ 12 яляʼ ӈэсондʼ манзараӈгу.
М.Яройʼ падвы
Сидяӈг: М. Ярʼ тадтавы
Авторы
Няръяна Нгэрм
Темы